-Та ойрд яагаад нам жим байна вэ?
-Хийх ажил маш их байна. Ярьж хийдэг бас ярихгүйгээр хийдэг ажил гэж бас байдаг юм шүү дээ. Сүүлийн нэг сар “Шударга ёсны эрэлд” номынхоо ажил дээр сууж, дөнгөж сая номоо хэвлэлтэнд өглөө. Ном бичнэ гэдэг бол амаараа ярихаас их өөр.
-Авлигатай тэмцэх газрын үйл ажиллагааг хянах ёстой олон нийтийн зөвлөлийн гишүүний хувьд дэд даргын томилгоог хэр хуульд нийцсэн гэж үзэж байна вэ. Б.Хурцын хувьд илчлэгдсэн тагнуул. Гадаадын улс оронд бол илчлэгдсэн тагнуулыг бүх насаар нь хэрэглэх мөнгийг нь өгөөд төрийн албанаас гаргадаг гэсэн?
-Олон нийтийн зөвлөлийн гишүүд Ерөнхийлөгчийн шийдвэрээр томилогддог. Авлигын эсрэг тэмцэлд олон нийтийн дэмжлэг туслалцаа хэрэгтэй байдаг. Үүнийг зохион байгуулах үндсэн үүрэгтэй шүү дээ. Түүнээс бус таны хэлсэн шиг тагнуул илрүүлэх үүрэг бидэнд байхгүй.
-Хуучин удирдлага Ч.Сангарагчаа нарыг гурван шатны шүүхээс ялласан. Тэднийг улс төртэй хутгалдсан учраас ялласан гэх хардлага бий?
-Шүүхийн шийдвэрт олон нийтийн зөвлөлийн гишүүн дүгнэлт өгөх нь зохимжгүй. Хэрэг маргааныг шүүхээр эцэслэн шийдвэрлэдэг. Улс төртэй хутгалдсан учраас бус урдах ажлаа хийж чадаагүй учраас ял авсан гэж би бодож байна.