Ойрхи Дорнодод баяр хөөрөөр дүүрэн байна. Үүний учир нь Израиль Палестины хооронд хоригдол солилцох гэрээ байгуулсан нь ажил хэрэг болж байгаа явдал юм. Энэ гэрээний дагуу Израйлийн армийн түрүүч Жилад Шалитыг Палестинаас Израйлийн шоронгуудад хоригдож буй 1000 гаруй палестинчуудыг суллах тухай болзол тавьсан. Нэг хүнийг мянган хүнээр солих нь аль аль талдаа янз бүрийн асуудал дагуулсан юм. Израйлийн засгийн газар энэхүү болзлыг ерөнхийлөгч Шимон Перес болон ерөнхий сайд Бенжамин Нетаньяху нарын оролцоотойгоор ихэд нарийн хэлцсэний үр дүнд хүлээн авахаар болсон юм. Улмаар Палестины ерөнхий сайд Махмуд Аббас болон Израйлийн ерөнхий сайд Бенжамин Нетаньяху нар эцсийн тохиролцоог хийснээр 1х1000 болж шийдэгдсэн юм. Үүнийг албан ёсоор зарласнаар тус асуудал дэлхий дахины анхаарлын төвд орж олон улсын хэвлэл мэдээллийн хэрэгслүүдийн нүүр хуудсанд дүүрч эхэлжээ. Энэхүү хоригдол шилжүүлэх зөвшилцөл Герман болон Египет улсын зуучлалын ихээхэн оролцоотойгоор шийдэгдэж байгааг мөн дурдах нь зүйтэй. Ингэснээр өчигдөр израйлийн армийн түрүүч Жилад Шалитыг палестины Хамас бүлэглэлийн дайчид египетийн хилээр израйлийн талд хүлээлгэж өгсөн. Тэндээсээ нисдэг тэргээр Тель-Авивт буусан юм. Харин израйлийн шоронгуудаас сулласан 477 хоригдлыг Газрын зурвасаар израйлийн тал Хамас бүлэглэлд шилжүүлэн өглөө. Харин үлдсэн 550 хоригдлыг ирэх сард Хамас бүлэглэлд шилжүүлэх ажээ. Жилад Шалит нь 2006 онд Газын зурваст хийсэн тусгай ажиллагааны үеэр Хамас бүлэглэлийн дайчдад олзлогдож палестины шоронд ямар ч ял тулгалгүй таван жил гаруй хоригдсон юм. Дээр дурдсанчлан аль аль талдаа янз бүрийн асуудал дагуулж буй хэмээсэн. Үүний нэг нь израйлийн иргэдийн талаас энэхү хоригдол солилцох ажиллагааг ихээхэн эсэргүүцэж буйтай холбоотой. Палестины иргэдийн хувьд суллагдсан хоригдлуудын ар гэрийнхэн, найз нөхөд төдийгүй улс даяараа баярын байдалтай хүлээж авч байгаа. Нэг ёсондоо палестины хувьд энэ нь том ялалт юм хэмээн үзэж буй. Гэсэн ч палестины 1000 иргэний амь израйлийн ганц иргэнийхтэй дүйж буй нь эмгэнэл хэмээн үзэгсэд ч байна. Өрнөдийн хэвлэлүүдээр ч мөн израйлийн тал нэг иргэнийхээ амийг ийнхүү өндрөөр үнэлж чадаж буйг гайхан бичиж байгаа. Гэхдээ хажуугаар нь алан хядагч, зэвсэгт бүлэглэлийн 1000 дайчинг суллаж дайсныхаа эгнээг нэмж байна хэмээн буруушаан бичих нь ч байгаа аж. Хамас бүлэглэлийнхэнд ар гэрийнхнээ ямар нэг байдлаар алдсан еврей иргэдийн хувьд энэ нь израйлийн засгийн газрын ухаангүй алхам, тэнэглэл хэмээн эсэргүүцэж байгаа. Улсаас нэг иргэнийхээ амийг өндрөөр үнэлж буй нь сайшаалтай ч өмнө нь амь үрэгдсэн олон олон еврей иргэдийн амийг ямар ч үнэ цэнэгүй болголоо хэмээж байна. Энэхүү эсэргүүцлийг израйлийн дээд шүүх огтхон ч хэрэгссэнгүй юм. Одоогийн байдлаар израйлийн шоронгуудад 5000 орчим палестинчуудад хоригддог ба үүний хамгийн хөнгөн гэмт хэрэг үйлдсэн хоригдлуудыг шигшин суллаж байгаа гэж тайлбарласан байна. Жилад Шалитыг түүний найз нөхөд, ар гэрийнхэн нь мөн ерөнхий сайд Беньямин Нетаньяху өөрийн биеэр баяр ёслолын байдалтай тосож авсан. Тэгвэл үүнээс ч илүүтэйгээр Газын зурваст палестинчууд баяр хөөр болж байна. Харин өрнөдийн хэвлэлүүд үүнийг янз бүрийн өнцгөөс харж бичсээр байна. Ямартай ч Ойрхи Дорнод энэ өдрүүдэд баярын уур амьсгалаар дүүрчээ. О.Нар