Английн “Ливерпуль”-ийн ахлагч Стивен Жеррард хөлийнхөө эрхийн хуруунд авсан бэртлийнхээ улмаас хагас жил орчим талбайд гараагүй билээ. Тэрээр өнгөрсөн амралтын өдөр “Манчестер Юнайтед”-ын эсрэг үндсэн бүрэлдэхүүнд багтан тоглосондоо тун сэтгэл хангалуун үлджээ. Учир нь Жеррард хөлбөмбөгийн талбайдаа эргэн гарахгүй ч байж магад хэмээн айж байсан гэнэ. “Элдэв бодол толгойд эргэлдэх нь миний насанд байх л асуудал. Би хүнд бэртэл авснаа ойлгож байлаа. Хугацаа багагүй шаардлагатайг мэдэж байв. Үнэнээ хэлэхэд, хөлбөмбөгийн замналдаа цэг тавьж байгаа юм шиг санагдаад сэтгэл тогтохгүй удсан. Би хагалгаа хийлгэтлээ тариа тариулаад л талбайд гараад байсан. Өөрийгөө ингэж хуурч болохгүйг мэдсээр байсан ч тоглох хүсэл минь дийлнэ. Олон ч тоглолтыг тариагаар аргалж ирсэн. Гэвч нэг л өдөр тариа ч тогтоож дийлэхээ больдог юм билээ. Энэ үед яахаа мэдэхээ больсон. Хэдэн долоо хоногийн дараа хагалгаа хийлгэчихээд л өөдрөг үзэл минь дахин сэргэсэн. Энэ зургаан сар миний хөлбөмбөгчийн замнал дахь хамгийн хэцүү үе байсан гэдэг нь ямар эргэлзээгүй үнэн” гэж Жеррард ярьжээ.

Р.Гэгээ