Монгол Улсаас ИБУИНВУ-д суугаа ЭСЯ, Монгол-Британийн худалдааны танхимтай хамтран Лондон хотноо Монгол-Британийн бизнесийн чуулга уулзалтыг зохион байгуулав. ЭСЯ-наас жил бүр уг чуулга уулзалтыг зохион байгуулж, заншсан бөгөөд жилээс жилд хэлэлцэх асуудлын хамрах хүрээ, тавигдах илтгэлүүдийн чансаа, илтгэгчдийн түвшин, оролцогдын тоо, цар хүрээ улам бүр өргөжиж иржээ. Энэ удаагийн чуулга уулзалт нь урд жилүүдэд зохиогдож байсан чуулга уулзалтуудаас хэд хэдэн онцлогтой байлаа. Нэгдүгээрт, Монголыг сонирхох, Монголын компаниудтай хамтран ажиллах, Монголд үйл ажиллагаагаа эхлүүлэх сонирхол Британид ихээр нэмэгдэж байгаа үед болж байгаа. Хоёрдугаарт, Британийн эдийн засгийн түүчээ болж явдаг Лондонгийн хөрөнгийн бирж, Рио Тинто компани, Стандарт чартерд, Барклиз банк зэрэг байгууллага Монголд хөрөнгө оруулж, хамтран ажиллаж, Монголд үйл ажиллагаагаа эрчимтэй явуулж эхэлж буй цаг мөчид болж байгаа. Гуравдугаарт, Монголын компаниуд Британийн, цаашилбал Европын, улмаар дэлхийн зах зээлд гарах, дэлхийн санхүү, хөрөнгийн зах зээлийн идэвхтэй оролцох сонирхол маш өндөр байгаа мөчид энэ бизнес форум болж байгаагаараа онцлогтой болов. Чуулга уулзалтад нийт 80 гаруй байгууллага, компанийн 250 гаруй төлөөгч оролцсоноос монголын талаас Үндэсний хөгжил, шинэтгэлийн хороо, Хууль зүй дотоод хэргийн яам, УБЕГ, МХАҮТ, Банкнуудын холбоо, Даатгагчдын холбоо, Орон сууцны зээлийн корпораци, “Эрдэнэс-МГЛ”, Монголын арилжааны банк, компани нийлсэн 40 гаруй байгууллага, аж ахуйн нэгжийн 70 гаруй төлөөлөгчид оролцов. Монгол Улсаас ИБУИНВУ-д суугаа Элчин сайд Б.Алтангэрэл Монгол-Британийн бизнесийн чуулга уулзалтыг нээж хэлсэн үгэндээ хоёр орны худалдаа, эдийн засгийн хамтын ажиллагаа сүүлийн жилүүдэд эрчимтэй хөгжиж байгаад сэтгэл хангалуун байгаагаа илэрхийлээд, Монгол Улсын эдийн засаг өндөр хурдацтай өсч буй өнөө үед Британийн хөрөнгө оруулалт, тэргүүний технологи, туршлага чухал ач холбогдолтойг онцлон тэмдэглэв. Монголын талаас Үндэсний хөгжил, Шинэтгэлийн хорооны дарга Ч.Хашчулуун, Хууль зүй дотоод хэргийн дэд сайд В.Удвал, Төрийн сангийн дарга Ч.Пүрэвсүрэн, УБЕГ-ын дарга Л.Мөнхбаатар, МХАҮТ-ын дарга С.Дэмбэрэл, Орон сууцны зээлийн корпорацийн Гүйцэтгэх захирал Ц.Энхбаяр, “Эрдэнэс-МГЛ” компанийн хөрөнгө оруулалт, санхүүжилтийн газрын дарга Ц.Цэнгүүн нар оролцон илтгэл тавьж, оролцогчдын сонирхсон асуултад хариулав. Чуулга уулзалтад Британийн Худалдаа, хөрөнгө оруулалтын асуудал эрхэлсэн төрийн сайд Лорд Грин оролцон, хэлсэн үгэндээ ИБУИНВУ нь өрнөдийн орнуудаас хамгийн анх Монгол Улстай дипломат харилцаа тогтоосон улс гэдгээрээ бахархаж явдгаа тэмдэглэв. Тэрбээр мөн хоёр талын худалдаа эдийн засгийн харилцаа эрчимтэй хөгжиж байгаад сэтгэл ханамжтай байгаа илэрхийлээд цаашид эдийн засгийн илүү өргөн хүрээтэй, урт хугацааны хамтын ажиллагаа хөгжинө гэдэгт итгэлтэй байгаагаа илэрхийлэхийн ялдамд 2012 онд Монгол Улсад айлчлах төлөвлөгөөтэй байгаагаа мэдэгдэв. Британийн компани болон Лондонд төвтэй банк санхүүгийн байгууллагын төлөөлж Рио Тинто компанийн зэсийн асуудал эрхэлсэн Захирал Э.Хардинг, Лондонгийн Хөрөнгийн Биржийн Гүйцэтгэх захирал С.Роле, Барклиз банкны дэд дарга Сэр Райт, Лорд Вейверли, Европын Сэргээн босголт хөгжлийн банкны Төв Ази хариуцсан захирал М.Хонма нар Монголтой хөгжүүлж буй хамтын ажиллагааныхаа талаар дэлгэрэнгүй мэдээлэл хийж, сонирхсон асуултад хариулав. Чуулга уулзалтын үеэр уул уурхай, банк санхүү, Монголын бизнесийн хууль эрх зүйн орчин, Монголд үйл ажиллагаа явуулж буй британийн компаниуд гэсэн салбар хуралдаанууд болж, тухай чиглэлд гарч буй ололт амжилт, тулгарч буй бэрхшээл, түүнийг арилгах арга замыг хэлэлцэв. Чуулга уулзалтын хоёрдахь өдөр “Монголын бизнесийн боломж” сэдэвт дугуй ширээний уулзалт Лондонгийн хөрөнгийн бирж дээр зохион байгуулагдлаа. Энэхүү дугуй ширээний уулзалт дээр Лондонгийн хөрөнгийн бирж, Монголын Үндэсний хөгжил шинэтгэлийн хороо, “Эрдэнэс-МГЛ” компанийн төлөөлөгчид дэлгэрэнгүй мэдээлэл хийж, санал солилцов. Тус биржийн зүгээс Монголын хөрөнгийн биржийн менежмент, технологийн шинэчлэлийн явцын талаар мэдээлэл хийж, төлөөлөгчдөд Лондонгийн хөрөнгийн биржийн үйл ажиллагааг танилцуулав. Чуулга уулзалтын төлөөлөгчид мөн Лондонгийн металлын биржид зочлов. Монгол-Британийн Бизнесийн чуулга уулзалт бизнес эрхлэгчдийг уулзуулж,  Британийн компаниудад Монголын эдийн засаг, бизнесийн орчин, хууль эрхзүйн зохицуулалт, хамтарч ажиллах боломжийн талаар үнэн бодит, шинэлэг мэдээлэл өглөө. Энэхүү арга хэмжээ нь Монголын компаниудад Лондонгийн санхүүгийн төвөөс өөрсдийн бизнесээ өргөжүүлэх, хөгжүүлэх боломжийг нээж олох үндсэн зорилготой. Засгийн газар, хувийн хэвшлийн төлөөлөгчид хоёр орны бизнес эрхлэгчдэд учирч буй хүндрэл бэрхшээлээ харилцан ярилцаж, түүнийг даван туулах, бизнесийн шинэ боломжийг нээхэд чухал арга хэмжээ боллоо.