Нийслэлийн шүүхэд өчигдөр Монголын байгаль хамгаалах иргэний хөдөлгөөнүүдийн эвслийн нэхэмжлэлтэй ”Петрочайна Дачин Тамсаг” ХХК-д холбогдох хэргийн давж заалдах шатны шүүх хурал болсон. Нийслэлийн шүүхийн шүүгчид энэ хэргийг хэлэлцээд анхан шатны шүүхийн шийдвэрийг хэвээр нь үлдээжээ.
Петрочайна Дачин Тамсаг /Монгол/ ХХК-д холбогдох хэргийг анхан шатны шүүхээс тус компани нь Дорнод аймгийн Матад сумын Буян-Өндөр багийн нутагт газрын тосны үйл ажиллагаа явуулахдаа байгаль хамгаалах, нөхөн сэргээх үүргээ бүрэн биелүүлээгүйг тогтоож, байгаль орчинд учруулсан 1,356,622,460 төгрөгийг гаргуулж Матад сумын төсөвт олгохыг даалгасан.
Харин Петрочайна Дачин Тамсаг компанийнхан "Матад сумын байгаль орчин учруулсан хохирлыг Байгаль хамгаалах иргэний хөдөлгөөнүүдийн эвсэл нэхэмжлэх эрхгүй. Байгаль орчноо сүйтгүүлсэн Матад сумынхан өөрсдөө нэхэмжлэх ёстой" гэж давж заалдаад байсан юм.
Д.Цэцэг