АНУ-ын нисгэгчгүй байлдааны онгоцууд Пакистаны Афганистантай залгаа хил дээр агаарын дайралт хийж 9 пакистан иргэд амь үрэгдсэний 3 нь цэргийн албан хаагчид байсан аж. АНУ-ын тал тус агаарын дайралтыг талибаны зэвсэгт дайчдын эсрэг хийсэн ажиллагаа хэмээн мэдэгдээд байгаа. Харин Пакистаны тал үүнийг илт өдөөн хатгасан цэргийн ажиллагаа хэмээн үзэж байгаагаа илэрхийлсэн байна. Энэ оны эхээр АНУ Пакистан улсын хил орчмоор нисгэгчгүй алсын удирдлагатай байлдааны онгоцны хөтөлбөрийг хэрэгжүүлж удаа дараа дайралт хийсээр байгаа. Дайралт болгонд олон пакистан хүний амь үрэгддэг юм. Энэ талаар Пакистаны тал эсэргүүцсэн мэдэгдэл гаргадаг боловч өнөөг хүртэл АНУ-ын талаас талибуудын эсрэг цэргийн ажиллагаа байлаа хэмээн хариулт өгсөөр ирсэн. Энэ нь хоёр түнш орны харилцааг хүйтрэлд оруулаад байгаа билээ.