АНУ-ын шүүх хавтгай дэлгэц үйлдвэрлэгч Тайваний хамгийн том пүүс “AU Optronics”-т шингэн кристал дэлгэц буюу LCD дэлгэцний үнэ хөөрөгдсөн хэргээр 500 сая ам.долларын торгууль төлөх шийтгэл ногдууллаа. Пүүсийн хоёр ахлах албан тушаалтныг гурван жил шоронд хорих болон тус бүр 200 мянган ам.доллар төлөх ял оноожээ. Тус компанийг LCD дэлгэцний үнийг өндөр байлгахаар өрсөлдөгч компаниудтай хуйвалдсан хэмээн буруутгаж байгаа юм. Энэ торгууль нь АНУ-ын шүүхээс зохиомол үнэ хөөрөгдөлтөнд ногдуулсан хамгийн өндөр торгууль болж байна. “Энэ нь баримтаар нотлогдсон, илэрхий хууль бусаар үнэ хөөрөгдсөн хуйвалдаан юм. Тиймээс 500 сая ам.доллар бол их биш, таарсан  гэж үзэж байна” хэмээн шүүгч Сьюзан Иллстон хэлжээ. LCD дэлгэцний үнэ хөөрөгдөлттэй тэмцэн Америкийн эрх баригчид цуврал арга хэмжээ авч байгаа юм. Өнгөрсөн жил БНСУ-ын Samsung компанийг оролцуулан долоон LCD дэлгэц үйлдвэрлэгчийг 553 сая ам.доллараар торгосон байна. Гэхдээ AU Optronics пүүс энэ мэдэгдлийг эсэргүүцэн, тэмцэхээ мэдэгджээ. Ц.Мишээл