Өнгөрсөн шөнө Аваргуудын лигийн дөрвөн тоглолт болж өнгөрлөө. Энэ тоглолтуудаас шөвгийн 16-д үлдэх эхний хоёр багийн нэр тодорсон юм. Өнгөрсөн жилийн аварга Барсачууд өнгөрсөн шөнө Чехийн Викториаг талбайд нь 4:0-ээр хичээл зааснаар нэг ч хожигдолгүй аваргын бууриа хадгалж хамгийн түрүүнд шөвгийн 16-д үлдсэн бол Милан Белоруссын аварга клуб БАТЕ-тэй 1:1-ээр тэнцсэн ч 8 оноотой хэсгээсээ хоёроор шалгарсан юм. Харин Аваргуудын лигийн хэсгийн тоглолтуудад сенсаци дэгдээсээр байгаа Киприйн АПОЕЛ Португалийн аварга Порто клубыг талбай дээр нь 2:1-ээр хожсоноор хэсгээ тэргүүлж бас л шуугиан дэгдээж байна. Энэ тоглолтод Киприйн багийн бразил тоглогч Эйлтон эхний гоолыг хийсэн бол талбайн эздээс Халк гоол оруулж тоог тэнцүүлсэн. Цаг дуусахын өмнөхөн Густаво Мандука гоолдсоноор киприйн баг ийнхүү хэсгээ тэргүүлэх боллоо. Улмаар АПОЕЛ дараагийн шатанд шалгарах найдвараа улам нэмэгдүүлж байна. Энэ хэсэгт орос, укрианы шилдгүүдийн тоглолт болсон. Энэ тулаанд Зенитийн Николас Ломбаертс эхний хагасын нэмэлт цаг дээр гоолдсоноор тоглолт дахин гоолгүй өндөрлөсөн билээ. Ингэснээр АПОЕЛ 8, Зенит 7 оноотойгоор G хэсгийг тэргүүлж байна. F хэсгийг тэргүүлэгч Арсенал Марселийн тоглолт олны анхаарлыг татаж байлаа. Премьер лигийнхээ аравдугаар тойргийн тоглолтод Челсиг 5:3-аар хожиж ялгуусан ялалт байгуулсан их буучид францын клубтэй өнгөрснөө мартсан мэт тоглосон юм. Хоёр клубын тоглолт 0:0-ээр гоолгүй тэнцсэн юм. Харин Дортмунд грекийн Олимпиакосыг 1:0-ээр хожиж 4 оноотой болсон. Е хэсэгт олны анхаарлыг зүй ёсоор татаж байсан Челси бельгийн Генкийг талбай дээр нь хожиж чадсангүй. Торресын дамжуулалтыг Рамирес чулуу болгож дөнгөсөн. Улмаар Давид Луис пенальт цохисон ч алдсан нь хожлоо алдсантай ялгаагүй явдал болсон юм. Генкийн Воссел 60 дахь минутад тоог тэнцүүлснээр энэ тоглолтын 1:1-ээр дууссан юм. Энэ бол Генкийн хувьд ялалт Челсигийн хувьд ээлжит азгүйтэл нь байлаа. Харин энэ хэсгийн Валенсиа Леверкузен нарын тоглолт үзүүштэй болж Валенсиа 3:1-ээр өрсөлдөгчөө буулгаж авсан билээ. Өнөө шөнө Аваргуудын лигийн эхний дөрвөн хэсгийн найман тоглолт болно.