Гадаадын иргэн харьяатын асуудал эрхлэх газар өнгөрсөн сард Монгол Улсад оршин суух, дамжин өнгөрөх, бүртгэл, зорчих, хөдөлмөр эрхлэх журам зөрчсөн болон визийн хугацаа хэтрүүлсэн зэрэг зөрчил гаргасан 31 орны 333 гадаадын иргэнд Гадаадын иргэний эрх зүйн байдлын тухай хуульд заасны дагуу арга хэмжээ авч, 54 сая 842 мянган төгрөгийн торгууль ногдуулжээ. Гадаадын иргэний эрх зүйн байдлын тухай хуулийг үндэслэн Монгол Улсад оршин суух зөвшөөрлийн хугацаа дууссан боловч тус улсаас гарч явахаас зайлсхийсэн, түр ирэгч виз, бүртгэлийн журмыг хоёр буюу түүнээс дээш удаа зөрчсөн, эрх бүхий байгууллагын зөвшөөрөлгүй хөдөлмөр эрхэлсэн, сэтгэцийн өвчтэй болохыг нь эрүүл мэндийн байгууллага тогтоосон зэрэг үндэслэлээр нийт найман орны 83 гадаадын иргэнийг Газрын даргын тушаалаар Монгол Улсаас албадан гаргаж, нутаг буцаасан байна.