Оны сүүлээр хүмүүс ирэх онд юу болох талаар бодож, зөгнөж тааж эхэлдэг. Одоогоос 80 гаруй жилийн өмнө буюу 1931 онд 2011 оныг хүмүүс юу гэж төсөөлж, тааж байсан талаар сонирхоё. 1931 онд хөрөнгийн бирж дампуурч, дэлхий нийтээрээ эдийн засгийн хямралд ороод 2 жил өнгөрч байсан. АНУ-ын ажилгүйдлийн төвшин дээд цэгтээ буюу 16 хувь хол давсан. Гэхдээ тэр үед хүмүүс ирээдүйгээ сайн сайхнаар төсөөлөхийг хичээж байсан. Дотрын алдарт эмч Маёо техник технологийн хөгжлийн тусламжтайгаар  Америкчуудын дундаж наслалт 70-д хүрнэ гэж байсан. Харин одоо тэдний дундаж наслалт 78 болсон гэхээр хол зөрөөгүй. 1931 онд Социологч Вилльям Огбурн Америкийн хүн амыг 160 саяд хүрнэ гэсэн байсан бол  өнөөдөр 2011 онд хүн ам 300 сая давсан. Гэхдээ  Вилльям Огбурн зурагт болон бусад цахилгаан хэрэгслийн удирдлага энгийн хэрэглээний зүйл болно гэж хэлсэн нь биелэлээ олжээ.

Майкл Пупин хөдөлмөрчид нийгмийн баялгаас тэгш хүртэнэ гэж таамагласан нь зарим улс оронд биелэлээ олсон бол зарим улс хэт чинээлэг болон үгээгүй ядуу давхарга болж хуваагдсан. Артур Комптон улс үндэстнүүдийн хил хязгаар яваандаа чухал байдлаа алдана гэж хэлсэн нь оновчтой байж болох юм. Өнөөдөр улс үндэстнүүд хил давахгүйгээр худалдаа хийж болж байна. Хоорондоо харилцаж, мэдээлэл солилцож болж байна. Улс үндэстэн дамнасан том компани корпорациуд бий болсон.  Гэхдээ улсын хил аюулгүй байдлын үүднээс чухал хэвээр байгаа. Харин авто машины алдарт Форд компанийг үүсгэн байгуулагч Хенри Фордоос 2011 оныг юу гэж таамаглаж байна вэ гэж асуухад, “Хүмүүс 2011 онд юу хийж байх нь л үнэ цэнэтэй болохоос өнөөдөр миний таамаглах нь чухал биш гэж хариулжээ.  Уншигч  та ч мөн таамаг дэвшүүлж болно. Одоогоос 80 жилийн дараа буюу 2091 онд хүмүүсийн амьдрал ямар болох вэ? Машин унаа, байшин барилга, хэрэглээ, хүн ам гээд та таамаглаад үзээрэй. 1931 онд амьдарч байсан эдгээр хүмүүс тийм ч муугүй таамаглаж байсныг 80 жилийн дараа бид харж байна. Н. ЭДДИ