Зээлийн мэдээллийг нэгдсэн сантай болсноор чанаргүй зээл багасна. Монгол улсын иргэд нэг үеийг бодвол дурын банкнаасаа хүссэн  хэмжээгээрээ зээл авах боломжтой болсон. Харин хэтэрхий нээлттэй болсон энэ эрх эсрэг үр дүнг өгч чанаргүй гэх зээл банкны салбарын хэмжээнд 402 тэрбум төгрөгт хүрээд байна. Үүнийг багасгах зээлийн мэдээллийн нэгдсэн санг байгуулах хуулийн төсөл УИХ-д орж ирж байна.

Монгол улсын банкны системийн хэмжээнд нийт 2,6 триллион төгрөгний зээл байна. Харин 2010 оны 10-р сарын эцсийн байдлаар үүнээс өрийн үлдэгдэл 309 тэрбум төгрөг байгаа бол хугацаа хэтэрсэн зээл 78.6 тэрбум,  харин чанаргүй зээл 402.3 тэрбум төгрөг болоод байна. Чанаргүй зээлийн ихэнхи нь зээлийн мэдээлэл дутуугаас  болдог. Зээлдэгч олон банкинд зээлтэй, зээлийн эргэн төлөх чадвар муу, мөн нэг барьцаагаар олон зээл авах зэрэг зөрчлүүд түгээмэл байдаг байна.

Ийм тодорхой жишээнүүд ч олон. Монгол газар компани л гэхэд Олон овоотын лицензийг Зоос, Анод банкуудад тавьж хэдэн тэрбумын зээл авсан нь дээрх 2 банкны дампуурал нөлөөлсөн байдаг.

Тиймээс зээлийн мэдээллийн нэгдсэн сан бий болгох хуулийн төсөл боловсруулж хэлэлцсэнээр зээлдэгчийн талаарх бүх мэдээллийг банк санхүүгийн байгууллагууд нэг сүлжээнээс цаг алдалгүй шуурхай авч эрсдлээс сэргийлэх боломжтой болох юм. Шинээр бий болох зээлийн мэдээллийн нэгдсэн сүлжээнд банк санхүүгийн байгууллага л хувь зээлдэгчтэй гэрээ хийсний үндсэн дээр нэвтэрч мэдээллийг авах боломжтой. Харин хувь хүмүүс болон бусад байгууллагад дээрх сүлжээнд нэвтэрч хувь хүний мэдээллийн нууцад халдахгүй байхаар хуулийн төсөлд зохицуулалт хийж өгөх юм.