2001 оны аравдугаар сарын 15-наас эхлэн дайны эрсдлийн даатгал гэх нэрээр Монголын Иргэний агаарын тээвэр компанийн зорчигч бүрийн тийзний үнэ дээр нэмж таван ам.долларын татвар авч орлогыг нь Японд харьяалалтай “Вэст вэлф” хэмээх даатгалын компанийн данс руу эхлээд Хонкгонгоор дамжуулж, дараа нь Японы Токио банк руу шилжүүлэн мөнгө угааж байсан хэргийг УМБГ-ын Эдийн засгийн гэмт хэрэгтэй тэмцэх хэлтэст шалгаж буй.

Уг хэрэгт  есөн хүнийг сэжигтнээр татаж баривчлаад байсан бол энэ сарын 20-ны өдөр прокуророос “Голомт” банкны “Солонго” салбарын захирал Г.Саранчимэгийг мөнгө угаасан гэх хэрэгт сэжиглэн Цагдан хорих 461 дүгээр ангид саатуулжээ.

Өмнө нь Нийслэлийн прокурорын газрын орлогч прокурор Ц.Батболд ““МИАТ” компанийн хэрэгт 9 хүнийг холбогдуулан шалгаж байгаа. Арилжааны банкуудыг холбогдуулан шалгасан юм байхгүй. Сүүлийн үед гарч байгаа их хэмжээний мөнгөтэй холбоотой хэргүүдэд холбогдсон сэжигтнүүд банкуудаар дамжуулан гүйлгээ хийсэн тохиолдол бий.

Банкинд мөнгө хадгалуулсан зэргээс үүдэн тэр байгууллагуудтай холбоотой мэдээллүүдийг олж авах ажиллагааг явуулж байна. Түүнээс биш арилжааны банкны ажилтнууд мөнгө угаасан хэрэгт холбогдолгүй” хэмээн мэдэгдэж байсан  юм. Зарим эх сурвалжийн мэдээллээр сэжигтнээр татагдсан Г.Саранчимэг нь  хэд хэдэн хүний иргэний үнэмлэх ашиглан данс нээж мөнгө авч байсан нь тогтоогджээ.

Уг хэрэгт холбогдуулан МИАТ компанийн гүйцэтгэх захирлаар ажиллаж байсан Ц.Орхон, тус компанийн гүйцэтгэх захирал асан Б.Эрдэнэбилэг, Ц.Орхоны гэргий Ү.Цэцэгмаа, Б.Бат-Эрдэнэ, тус компанийн Коммер, санхүү хариуцсан захирал асан Ч.Хоролсүрэн, түүний төрсөн дүү Ч.Суурьтогтох, Ч.Хоролсүрэнгийн компанийн нягтлан Н.Гантөмөр, С.Батхишиг, нарыг холбогдуулан шалгаж байгаа юм.

Тэднийг Монголын иргэний агаарын тээвэр компаниар дамжуулан “Дайны эрсдлийн сан” гэх нэрийдлээр гадаадын таван улсын банкны дансанд мөнгө байршуулж, угаасан хэрэгт сэжигтнээр тооцон цагдан хориод буй.