Улсын баяр наадмын комиссын Үндэсний бөхийн салбар комисс өчигдөр хуралдсан байна. Хуралдаанаар 2011 оны улсын баяр наадамд зургаа давж, харцага цол хүртсэн Г.Алтангэрэл, тав давж начин цол хүртсэн Ч.Цогбаяр нарын хүсэлтийг хэлэлцжээ. Тэд сэргээш хэрэглэсэн нь тогтоогдож барилдах эрхээ хоёр жилийн хугацаагаар хасуулсан юм.

Тус хоёр бөх барилдах эрх нь наадмын дараа сэргэх тул энэ жилийн улсын барилдаанд оролцохыг хүсч, наадмын комисст ханджээ.

Энэ асуудлаар МҮБХ-ны тэргүүн Р.Нямдоржоос тодруулахад “Өчигдөрийн Үндэсний бөхийн салбар комиссийн хуралдаанаар  эрхээ хасуулсан бөхчүүдийн асуудлыг авч хэлэлцсэн байна. Би уг хуралдаанд оролцож амжаагүй. Сураг сонсох нээ, эрхээ хасуулсан бөхчүүдийг наадмаар барилдуулахаар болсон юм шиг байна. Энэ асуудлыг Үндэсний бөхийн салбар зомисс авч хэлэлцээд эл бөхчүүдэд дахин хатуу сануулга өгч, эрхийг нь сэргээе гэсэн саналыг Улсын баяр наадмыг зохион байгуулах комисст хүргүүлэхээр шийдвэрлэсэн байна. Асуудлыг Улсын баяр наадмын комисс эцэслэн шийдэх байх”  гэв.