Барилга хот байгуулалтын яам, Шударга өрсөлдөөн хэрэглэгчийн төлөө газраас хамтран найман хувийн хүүтэй орон сууцны зээлтэй холбоотой асуудлаар мэдээлэл хийлээ. Энэ үеэр Шударга өрсөлдөөн хэрэглэгчийн төлөө газрын дарга О.Магнай “Барилгын материалын үнийн байдал тогтвортой байна гэсэн судалгаа гарсан. Одоогийн байдлаар 900 орчим тэрбум төгрөгийг баригдаж буй барилгуудад зарцуулагдах төлөвлөгөөтэй найман хувийн зээл батлагдсан. Бидний хийсэн судалгааны үндсэн дээр зарим компани үнээ нэмсэн нь тогтоогдсон. Нийт 18 компани үнээ үндэслэлгүйгээр нэмсэн бол 11 компани үнээ бууруулсан гэсэн судалгаа гарлаа. Эдгээр компаниуд үнээ зохиомлоор нэмсэн байна. Үнээ нэмсэн компаниудтай хариуцлага тооцох болно” гэв.

Мөн тэрбээр “Одоогийн байдлаар нийт 18 компани үнээ үндэслэлгүйгээр нэмсэн. Үндэслэлгүйгээр үнээ нэмсэн эдгээр компаниуд 80 м2-аас доош талбайтай. Үнээ 100-300 мянган төгрөгөөр нэмсэн гэсэн судалгаа гарсан. Төрийн бодлогын эсрэг үйл ажиллагаагаа явуулсан эдгээр  нөхдүүдэд хариуцлага тооцох болно. Түүнчлэн, бага орлоготой иргэдийг орон сууцжуулах ажлын хүрээнд хийгдэж байгаа энэ ажилд зарим нэг нөхдүүд бодлоготойгоор ийм шуугиан дэгдээгээд байна. Энэ асуудал дээр төр маш их анхаарч байгаа. Бид энэ удаад судалгаагаа газар дээрээс нь хийсэн. Судалгааны үндсэн дээр барилгын материалын үнэ тогтвортой байна. Тиймээс үнээ үндэслэлгүйгээр нэмсэн эдгээр компаниудад холбогдох албаныхан хариуцлага тооцох болно” гэжээ.