Монгол Улсын Ерөнхийлөгчийн сонгуулийг ажиглаж буй Европын аюулгүй байдал хамтын ажиллагааны байгууллагын ардчилсан институт, Хүний эрхийн газрын Сонгуулийг Ажиглах Хорооноос сонгуулийн дараах урьдчилсан мэдэгдэл хийлээ.

Сонгуулийг ажиглах хороо нь 33 орны 210 ажиглагчаас бүрдэж байгаа бөгөөд урт хугацааны 43 шинжээч, мөн тус байгууллагын хүсэлтээр гишүүн орнуудаас томилогдон ирсэн богино хугацааны 167 ажиглагч Монгол Улсын Ерөнхийлөгчийн сонгуулийн үеэр ажиллажээ.

Энэ талаар тус Хорооны дарга, элчин сайд, хатагтай Одри Гловер “Монголын сонгуульд бид анх удаа хөндлөнгийн ажиглалт хийлээ. Тиймээс энэ бол түүхэн үйл явдал байлаа. Манай хорооны эхний ажиглагч нар өнгөрсөн таван сард ирсэн. Бид нар сонгуультай холбоотой олон улсын үүрэг, гэрээ , амлалт, хууль тогтоомжийн дагуу үйл ажигллагаагаа явуулсан. Бид аливаа үзэл баримтлал, намд харъяалагдахгүй, олон улсын бүх сонгуульд энэ зарчмаар ажиглалтаа хийдэг. Бидний үүрэг бол сонгуулийн явцыг техник болон үзэл санааг судлах явдал юм. Монголын Ерөнхийлөгчийн сонгуулийн явц сайн боллоо. Гэвч хууль, хуулийн хэрэгжилт хангалттгүй санагдлаа. Энэ сонгуулийн үед Европын аюулгүй байдал хамтын ажиллагааны байгууллагын ардчилсан институтын тавигдсан шаардлагын 50 хувь нь биелэсэн” хэмээн ярив.