УИХ дахь Ардчилсан намын бүлэг өнөөдөр УИХ-ын чуулганы хуралдааны  түр завсарлагааны дараахи  анхдугаар хуралдаанаа хийлээ. Хуралдааны эхэнд   Ардчилсан намын бүлгийн дарга Д.Эрдэнэбат долдугаар сарын 1-н бол монголын түүхэнд хараар үлдсэн өдөр. Тийм өдөр  монголын төрд тэр тусмаа ардчилсан төрийн үед  дахин давтагдахгүй байх ёстой гэдгийг онцолсон. Мөн саяхан болж  өнгөрсөн  Монгол Улсын Ерөнхийлөгчийн сонгуулиар Ардчилсан Ерөнхийлөгчөө дэмжиж,  дахин итгэл үзүүлсэн  ард түмэндээ талархаж буйгаа бүлгийн нийт гишүүдийн өмнөөс илэрхийлэв.

Энэ өдрийн бүлгийн хуралдаанаар УИХ-ын намрын чуулганаар хэлэлцэх асуудлын тухай УИХ-ын тогтоолын төслийг хэлэлцэв. Сонгууль дууссан,  ажилдаа өмнөхөөсөө илүү анхаарах цаг болсон. Улс төр, эдийн засаг, нийгмийн ач холбогдол бүхий чухал хуулийн төслүүдийг УИХ-ын намрын чуулганаар хэлэлцэх нь зүйтэй гэдэгт гишүүд санал нэгдлээ. Тухайлбал, Монгол Улсын эдийн засгийн  хөгжлийн  талаарх багц хууль, Газрын тухай багц хууль, Сонгуулийн тухай, Улс төрийн намын тухай, Эхчүүд, хүүхдэд тэтгэмж үзүүлэх тухай “Олуулаа” хууль, Баялгийн сангийн тухай,  Хөрөнгө оруулалтын тухай  зэрэг хуулийн төслүүдийг  зайлшгүй хэлэлцэх нь зөв гэж үзлээ.

П.Наран