Хүлгийн тоос хүүхдийн гийнгоо хүчтэний дэвээтэй Монгол наадам хаяанд ирлээ. Төрт ёсны Их баяр наадам Монголоороо бахархах омогших сэтгэлийг хүн бүрийн зүрхэнд бадрааж, Монгол түмэн үндэсний дээл хувцсаараа гангарч, хотол олноороо төдийгүй дэлхийг баясуулан цэнгэдэг сайхан уламжлалтай.

Үүнтэй холбогдуулан Шинэчлэлийн Засгийн газрын дэмжлэгтэйгээр “Мишээл ЭКСПО” төвд “Монгол наадам-Монгол брэнд” нэртэй үзэсгэлэн худалдаа өнөөдөр нээлтээ хийлээ.

Уг үзэсгэлэн  худалдаанд үндэсний 80 гаруй компани бүтээгдэхүүнээ сурталчлан, худалдаалж байна. “Монгол наадам, монгол брэнд” үзэсгэлэн худалдааны үеэр өдөр бүр ардын урлагийн тоглолт, өсвөрийн шагайн харваачдын үзүүлэх тоглолт болж байгаа юм байна. Мөн гадны зочид, жуулчид Монгол гэрт зочилж, монгол ахуй, соёл уламжлал, монгол гэрийн хийц загвартай танилцаж байгаа аж.

Наадамд зориулсан үзэсгэлэн худалдаанд үндэсний үйлдвэрлэлийн оёмол, сүлжмэл, гар урлал, модон эдлэлийн бичил, жижиг дунд, томоохон үйлдвэрлэгч, нийлүүлэгч зуучлагч, борлуулагч зэрэг 32 аж ахуйн нгэж байгууллага оролцож буй юм.

Үзэсгэлэн худалдааны үеэр дуудлага худалдаа зохион байгуулж, оролцогч аж ахуйн нэгж, иргэдийн бүтээгдэхүүнийг  танилцуулж байна. Үзэсгэлэнд оролцогчид нь эрхэлж буй үйл ажиллагаагаа сурталчлан таниулах, түншээ олох, бүтээгдэхүүнээ борлуулах, зах зээлд гарах том үйлдвэрлэлийн хамтрагчаа олохыг зорьж байгаа ажээ.

Мөн Увс аймгийн Өндөрхангай, Цагаанхайрхан, Зүүнговь, Ховд, Бөхмөрөн сумын сүү, цагаан идээ болон малын гаралтай түүхий эдээр бүтээгдэхүүн боловсруулагчид оролцож, өөрсдийн бүтээгдэхүүний дээжийг дэлгэжээ. Уг цагаан идээнүүдээс цэвэр сүү, өрөм, шар тос, ааруул, ээзгий зэрэг бүтээгдэхүүн борлуулалт, эрэлт ихтэй байгааг худалдагч нар нь уламжлаж байлаа.

Б.Одон

 Гэрэл зургийн Б.Мөнх-Эрдэнэ