Кубын тэрс үзэлтэн Фариньяст түүний 2010 онд хүртсэн Андрей Сахаровын нэрэмжит шагналыг нь нөхөн олгожээ. 51 настай Гильермо Фариньяс Эрнандес нэр хүндтэй шагналаа гардан авахаар Страсбургд биечлэн ирсэн байна.  Кубын нэртэй сэтгэлзүйч, бие даасан сэтгүүлч, тэрс үзэлтэн Фариньяс олон жилийн дараа эх орноо анх удаа орхин гарсан юм. Түүнд олон улсын нэр хүндтэй шагнал болох Сахаровын нэрэмжит шагналыг нь гардуулахдаа Евро парламентын дэд тэргүүн Жованни Питтелла “Тэмцлийн арга хэлбэр үргэлж өөр өөр байдаг. Хэдийгээр Фариньяс ихэнх тохиолдолд өөрийн тэмцлийн хэлбэрээр өлсгөлөн, суулт зэргийг сонгож байсан ч тэрбээр энэ байдлаараа дуу хоолой, үзэл бодлоо ард түмэндээ хүргэж чаддаг байсан” хэмээн тэмдэглэжээ.

.

Фариньясын уйгагүй тэмцлийн дүнд Кубын засгийн газар улс төрийн хэргээр хоригдож байсан 52 хүнийг шоронгоос сулласан юм. Чухам тэмцлийн энэ л арга хэлбэрээ ашиглан Фариньяс Кубын иргэдийн интернэтэд нэвтрэх эрхийн төлөө тэмцэж, улс төрийн цензурыг сөрөн зогсч байсан удаатай. Ийнхүү өөрийн амь биеэ хайрлалгүй тэмцэж байсан Фариньяст одоогоос гурван жилийн өмнө Сахаровын нэрэмжит “оюун ухааны эрх чөлөөний төлөөх” тэмцлийн шагналыг олгосон ч Кубын тэрс үзэлтэн шагналаа авахаар ирж чадаагүй юм. Түүнд нэр хүндтэй шагналыг нь Страсбург дахь Евро парламентын тусгай хуралдаан дээр гардуулан өгчээ.

.

Б.Дэлгэрцэцэг