Монгол Улсын Үндсэн хуулийн цэц байгуулагдсаны 21 жилийн ойг тохиолдуулан Үндсэн хуулийн хөшөө нээх ёслолын ажиллагаа өнөөдөр Үндсэн хуулийн цэцийн ордны өмнөх талбайд боллоо.Монгол Улсын газрын зургийн хэлбэртэй байгалийн  боржин чулуугаар бүтээсэн энэхүү хөшөөний дээр нь монгол гэрийн хэлбэр бүхий бүрхүүл,  хөшөөний өмнөх хэсэгт тулга байрлуулсан байна.Үндсэн хуулийн цэцийн дарга, Монгол Улсын гавьяат хуульч  Ж.Амарсанаа энэ арга хэмжээг нээж хэлсэн үгэндээ, Үндсэн хуулийн хөшөө нь Үндсэн хуулийн цэцийнхний сэтгэл зүтгэлээр бүтсэнийг дурдаад Үндсэн хуулийн цэц  өөрийн ордон, Үндсэн хуулиар овоглосон гудамжтай бөгөөд одоо Үндсэн хуулийн хөшөөтэй болж байгааг онцлон тэмдэглэв. Дараа нь “Үндсэн хуулийн шүүх эрх мэдэл.Шүүх эрх мэдэл” номын нээлт боллоо. Үндсэн хууль болон цэц, шүүхийн тухай хуулиудыг  эмхэтгэн англи хэлний орчуулгын хамт нэг ном болгон хэвлэн гаргаж байгаа нь энэ ажээ. Энэ ном гурван хэсэгтэй бөгөөд  эхний хэсэгт, Монгол Улсын Үндсэн хууль, хоёр дахь хэсэгт нь Үндсэн хуулийн цэцийн тухай, Үндсэн хуулийн цэцэд маргаан хянан шийдвэрлэх тухай хуулиуд, гурав дахь хэсэгт нь Хуульчийн эрх зүйн байдлын тухай, Шүүхийн тухай, Шүүгчийн эрх зүйн байдлын тухай, Шүүхийн захиргааны тухай, Шүүхийн иргэдийн төлөөлөгчийн эрх зүйн байдлын тухай, Эвлэрүүлэн зуучлалын тухай хуулиудыг эмхэтгэн нийтэлсэн байна. Эдгээр арга хэмжээний хүрээнд өнөөдөр Үндсэн хуулийн цэцийн ордонд Үндсэн хуулийн цэцийн гишүүд болон ажилчдын хүүхдүүдийн бүтээсэн гар зургийн үзэсгэлэнгийн нээлт боллоо  гэж Үндсэн хуулийн цэцийн хэвлэл, мэдээллийн төлөөлөгч мэдээлэв.