Өнгөрөгч сар жагсаал цуглаанаар дүүрэн сар байлаа. Ертөнцийн нөгөө бөөрөн дэх бразильчууд тээврийн хэрэгслийн үнэ нэмлээ гэж жагслаа. Хөлбөмбөгийн төлөө амиа өгөхөөс буцдаггүй гэж боддог ард түмэн маань сүүлдээ дэлхийн аварга шалгаруулах тэмцээнийг явуулахыг эсэргүүцлээ. Ерөнхийлөгч, хатагтай Дилма Русеф ард түмэндээ олон амлалт өгч байж эсэргүүцлийн жагсаал цуглаан намдааж байв.

Мөн Грек, Болгарт, Чили, Камбож мөн эмэгтэйчүүдийн “FEMEN” хөдөлгөөнийхөн хүртэл энэ сар жагсаж тэмцээд авав.

Туркчууд бүтэн сарын турш Таксим талбайдаа үндэсний цэцэрлэгт хүрээлэнгээ аврах эсэргүүцлээ илэрхийллээ. Цөөнгүй хүн амиа алдаж  мянган хүнийг баривчилж саатуулж ерөнхий сайд Эрдоган хатуухан мэдэгдэл хийж гаргасан шийдвэрээ цуцалж байж улс орных нь байдал тогтвортой болох тал руугаа хэлбийж байна.

Манай өмнөд хөршийн Шинжаан Уйгарт мөн л үндэстэн хоорондын зөрчилдөөн гарч олон хүнийг  баривчилсан ээлжит хэрэг гарлаа.

Энэ бүгдээс дэлхий нийтийн анхаарлыг Египетийн Тахрир талбайд болсон эсэргүүцлийн жагсаал ихээхэн татаж байна. Ердөө   жил  гаруйн  өмнө анхны  ардчилсан сонгуулиар сонгогдсон ерөнхийлөгч Мухаммед Мурсиг  армийнхан хүчээр огцруулан,  түүний талын дэмжигчдийг баривчлан тус улсын нийслэлд буун дуу гарах болжээ.

Хоёр жилийн өмнө Египетийн дарангуйлагч Хосни Мубаракийг мөн  л армийнхны тусламжтай огцруулсан ч  тус улс ардчиллын замаар тууштай явж чадахгүй байна. Тус улсын Батлан хамгаалахын сайд, генерал мэдэгдэл хийж Үндсэн хуулийн үйлчлэлийг зогсоож Үндсэн хуулийн шүүхийн дарга Адли Мансурыг түр ерөнхийлөгчөөр сонгон хоёр өдрийн өмнө тангараг өргөлөө.

Дэлхий нийт армийнхныг төрийн эргэлт хийж байхад дэмжин уухайлж, баярлан хүлээн авч байгаа египетчүүдийг гайхан харж байна. Чили, Камбож гэхчлэн цэргийнхний хийсэн төрийн эргэлтийн  харгис үр дүнг хүн төрөлхтөн мартаагүй байна. Армийнхан хүч хэрэглэхийг эн тэргүүнд тавьдаг. Тэд тушаалаар “махны машин” шиг ажилладгийг мэдэхгүй хүнгүй. Одоо  тэдний сонгож авсан зам хэр оновчтойг харах л үлдлээ.

Харин ерөнхийлөгчийн сонгуульд нэр дэвших өндөр магадлалтай байгаа Олон улсын цөмийн эрчим хүчний агентлагийн захирал Мохаммед эль Барадей сонгогдвол улс орноо зөв замд оруулах найдвар бага ч гэсэн төрүүлж байгаа юм. Тэрбээр Нобелийн энх тайвны шагнал хүртэж байсан. Дипломатч, ажлын арвин туршлагатай, олон улсад нэр хүндтэй нэгэн билээ.

Египетийн талаар НҮБ-ын ерөнхий нарийн бичгийн дарга Бан Ги Мун иргэний нийгэм байгуулахыг анхааруулж, төрийн эрхэнд цэргийнхэн гарсанд харамсч байгаагаа илэрхийлсэн юм.

Хамгийн сүүлд авсан мэдээллээр Египетийн олон хот суурин газарт сөргөлдөгч талууд нэгнээ алж шархдуулан буун дуу гарах болсон тухай дэлхийн хэвлэл мэдээллийн агентлагууд дамжуулж байна.  Тус улсын эмнэлгийн байгууллагаас авсан мэдээгээр 30 гаруй хүн бууны суманд амиа алдсан аж.

Домгийн пирамидуудын эх нутаг, хэдэн мянган жилийн түүх, соёлтой ард түмэн дахин бужигнаж эхэллээ. Аялал жуулчлалаас дотоод нийт бүтээгдэхүүнийхээ  багагүй хувийг олдог египетчүүдэд энэ зун аялагчдад үйлчлэх зав гарахгүй нь.