Нийслэлийн агаарын бохирдлыг бууруулах Үндэсний хорооны хурал өнөөдөр болж, Эрүүл мэндийн сайд С.Ламбаа “Улаанбаатарын агаарын бохирдлын хүн амын эрүүл мэндэд үзүүлж буй нөлөөлөл” сэдвээр, Үндэсний хорооны ажлын албаны дарга Р.Мягмар хорооноос хийж буй ажлын талаар мэдээлэл хийлээ. Монголын Мянганы сорилын сангийн “Цэвэр агаар” төслийн хүрээнд арваннэгдүгээр сарын 15-ны байдлаар 26775 сайжруулсан зуух, нийт 36159 ширхэг эрчим хүчний хэмнэлттэй бүтээгдэхүүн борлуулаад байгаа аж. Энэ нь борлуулалт 37.5 хувьтай байна гэсэн үг. Үртсэн шахмал түлшний үйлдвэрүүдийн гэрээний биелэлт 64.7, хагас коксон түлшнийх дөнгөж 7.4 хувьтай байна. Айл өрхийн цахилгаан эрчим хүчний үнийг хөнгөлөх урамшууллын журам, Аж ахуйн нэгж байгууллагад урамшуулал олгох журам Засгийн газрын хуралдаанаар арваннэгдүгээр сарын 22-нд батлагдсан ч албажих шатандаа буй тул эхний ээлжинд зуух авсан айлуудаа хамруулах бодолтой байгаагаа Үндэсний хорооны ажлын албаны дарга ярив. Түүнээс гадна ДЦС-2 ТӨХК-ийн коксжих нүүрсний үйлдвэрийн нэгдүгээр ээлжийн ажил хоцронгуй буюу 80 хувьтай байгаа ажээ. Монгол алт ХХК-тай гэрээ байгуулж, 2012 оны эхний хагасад 21 мянган тонн хагас коксон түлш нийлүүлэхээр болжээ. Авто тээврийн хэрэгслээс гарах бохирдлыг бууруулах ажлын хүрээнд үйлчилгээнд явж буй том оврын 400 автобусыг дизель болон шингэрүүлсэн хийн түлшний хосолмол хэрэглээнд шилжүүлэх ажил арванхоёрдугаар сард багтан дуусах юм байна. Мөн төрийн албаны үйлчилгээнд явж буй 1500 тээврийн хэрэгсэлд хорт утааны шүүлтүүр суурилуулах ажлыг Хаш техник ХХК-аар гүйцэтгүүлсэн байна. Стандарт хэмжил зүйн газраас хагас коксон түлшний стандартыг батлан гаргажээ. Үндэсний хорооны дарга Д.Баттулга хэлэхдээ “Агаарын бохирдлыг бууруулах чиглэлийн ажилд оролцож байгаа яамд, нийслэлийн Засаг даргын Тамгын газар, бусад байгууллагын авч буй арга хэмжээний үр дүнд бид зарим төлөвлөсөн зүйлээ хийгээд байна. Хүмүүс үр дүн нь гарахгүй байна, гарч байна гээд янз бүрээр л ярьж байгаа. Бид утааг бууруулах л ажил хийж байгаа. Энэ тийм өргөс авсан юм шиг амархан үр дүн нь мэдрэгдээд байдаг ажил биш юм. Гэхдээ ганц нэг жишээ хэлье. Дарь эхэд 52 уурын зуух хааж төвлөрсөн дулаанд холболоо. Тэнд өчигдөр хэмжилт хийлгэсэн. Түүнийгээ 2009 оны 10 сарынхтай харьцуулж үзлээ. Бас ч гэж арай дулаан үеийн үзүүлэлт. Тэр үед тэнд нэг шоо метрт 4 мг тоосонцортой байж. Өчигдөр 0,5 мг хүрэхгүй байна. Чингэлтэй, Сүхбаатар дүүрэгт 20-иод мянган айлд утааг 90 хувь багасгадаг турк зуух тараасан. Эдгээр айлын утаа 32-ын тойрогт орж ирдэг. Түүнийг бас өчигдөр хэмжлээ. 2009 онд тоосонцор нь 2,5 мг байсан бол өчигдрийн хэмжилтээр 1 хүрэхгүй болжээ. Энэ мэтчилэн авсан арга хэмжээ тухай тухайн бүсдээ үр дүнгээ өгч байна. Гэтэл 3,4 дүгээр хорооллын хойд талын айлуудыг үртсэн болон хагас коксон түлшээр хангах байсан ч гэрээ хийсэн үйлдвэрүүдийн хариуцлагагүйгээс олигтой нийлүүлж чадсангүй. Тэнд утаатайгаа л байна. Цахилгаан халаагуур мянгаад айлд тавиад туршиж байна. Дээр нь Дэнжийн мянга, Ус-15-ын 100 гаруй уурын зуухыг хаахаар төлөвлөөд ажиллаж байна. Эдгээр ажлын үр дүн хүмүүсийн эрүүл мэндэд хэрхэн эерэг нөлөөлж буй байдлыг Эрүүл мэндийн яам, Цэвэр агаар сантай хамтран тогтоолгох судалгааг Ламбаа сайдын хэлснээр хийлгэх нь зүйтэй юм. Үүний зэрэгцээ агаарын чанар, бохирдол, түүний хот, суурин газрын хүн амын эрүүл мэндэд үзүүлэх нөлөөллийг тодорхойлсон мэдээг олон нийтэд хэвлэл мэдээллийн хэрэгслээр өдөр бүр хүргэхэд анхаарахыг сэтгүүлчдээс хүсч байна” хэмээв