Хэдхэн хоногийн өмнө Изинис компаний СААБ-350 онгоцны дугуй буух үед нь мултран унаж олон хүний халуун амийг хөнөөх дөхсөн. Тэгвэл өнөө өглөө 09.00 цагт Улаанбаатараас Говь-Алтайн чиглэлд нислэг үйлдэхээр хөөрсөн Аэро-Монгол компанийн 82-50 дугаартай Фокер–50 онгоцны зорчигчийн салоны цонх нь хагарсан тул уг цаашид нислэг үйлдэх боломжгүй болж эргэн ослын буулт хийжээ гэх мэдээлэл цацагдаж байна.

Уг мэдээллийн дагуу ИНЕГ-ын хэвлэл мэдээллийн ажилтан н.Пүрэвсүрэнгээс тодруулахад “Ийм мэдээлэл одоохондоо манайд ирээгүй байна. Мэдээлэл ирвэл та бүхэнд шуурхай мэдээллэх болно” гэв.

Иймд  Аэро-Монгол компанийн Говь-Алтай дахь салбарын төлөөлөгч рүү холбогдож, дараахи тодруулгыг авлаа.

-Сайн байн уу. Шууд.мн сайтаас ярьж байна. Өнөөдөр өглөө Улаанбаатараас Говь-Алтайн чиглэлд нислэг үйлдэхээр хөөрсөн танай компанийн 82-50 дугаартай Фокер–50 онгоцны цонх хагарч, ослын буулт хийсэн гэх мэдээлэл ирлээ?

-Тийм зүйл болоогүй.

-Онгоц ослын буулт хийсэн нь үнэн юм уу?

-Говь-Алтай аймагт цаг агаар муу байна. Их хэмжээний бороо орсон учраас ослын буулт хийсэн.

-Хэдэн цагт онгоц ниссэн бэ?

-Онгоц 09.00 цагт нисэх байсан. Гэхдээ цаг агаарын улмаас 09.50 цагт хөөрсөн. Өөр зүйл болоогүй” гэлээ.