Монгол Улсын Ерөнхийлөгч Ц.Элбэгдоржийн Наадмын нээлтэнд хэлсэн үг

Их Монгол Улс байгуулсны 807 жилийн ой, Ардын хувьсгалын 92 жилийн ойн Үндэсний их баяр наадмын ёслолын үйл ажиллагааг Монгол Улсын Ерөнхийлөгч Цахиагийн Элбэгдорж нээж үг хэллээ. Тэрээр Мөнх Хөх Тэнгэрийг бэлгэдсэн хөх цэнхэр өнгийн дээл хувцасаар гоёсон нь тун сайхан харагдаж байлаа. Ингээд та бүхэнд Ерөнхийлөгч Цахиагийн Элбэгдоржийн хэлсэн үгийг хүргэж байна.

 Эрхэм хүндэт Монгол түмэн наадамчид аа, эрхэмсэг зочид хатагтай ноёд оо,

 Монголын сайхан эх орондоо болон дэлхийн олон газар наадамлаж байгаа нийт иргэд наадамчин олондоо Монгол наадмын халуун мэндчилгээ өргөж, хамгийн сайн сайхныг хүсэн ерөөе.

Энэ зуны наадам сайхан эхэлж байна. Билэг билгийн дээд Монгол наадам маань энэ жил олон сайхан ерөөл билгээр дүүрэн байна.

Аав ээжийнхээ ачийг хариулахын төлөө зүтгэж байгаа хүүгийн сэтгэлээр ард иргэдийнхээ төлөө зүтгэх болно. Наадамчиддаа уяа хөнгөн, цэц мэргэн, бяр их наадамлахын ерөөлийг өргөн дэвшүүлье. Монгол төрийн наадам ийнхүү эхэлж байгаа төрийн есөн хөль цагаан тугийн өмнөх энэхүү индрээс даяар олондоо тунхаглаж байна.

Монголчууд бид наадмаараа билэгтэй сайхныг хэлэлцэж, түүх соёл, өв уламжлаараа бахархаж,   гэр бүл, ахан дүүс, хотол олноороо цуглаж магнай тэнийн баяраа хуваалцдаг.

Монгол наадмын хүндэт хоймроос азай буурал ахмадууд, цог хийморьлог залуус, алиа бяцхан үрс ард иргэддээ болон манай наадмыг үзэж сонирхож байгаа нийт зочид төлөөлөгчдөд сайхан наадамлахын өлзийтэй ерөөлийг өргөн дэвшүүлье.

Түмний цэнгэл их баяр наадамдаа эр бяр, хурд шанадас, цэц мэргэнээ сорих нийт иргэддээ аз хийморь, амжилтын дээдийг хүсэн ерөөе. Эх түүхт эрх чөлөөт Монгол түмний цэнгэл баяр бахархал омогшлын дээд Монгол наадам энэ цаг мөчид ийнхүү эхэлж байгааг эх цагаан сүлд билэг ерөөл бүхний биелэл оршсон наадмын энэ хүндэт индрээс даяар олноо тунхаглан зарлаж байна.

Сайхан наадаарай.

Мөнх хөх тэнгэр минь ээ, Монгол түмэн эх орныг минь үүрд ивээгтүн

.