Баяр наадмын өдрүүдээр орон нутагт хур бороо элбэгтэй байснаас голуудын усны түвшин нэмэгдэж, гол үеэрлэн иргэд усанд осолдсон дуудлага онцгой байдлын аврагч нарт цөөнгүй иржээ. Тухайбал, Сэлэнгэ аймгийн Сүхбаатар сумын 4 дүгээр багийн “Өндөр-Эрэг” гэдэг газар Орхон голын усанд иргэн Ц /30 настай, эрэгтэй/ осолдсон, Сайхан сумын нутаг дэвсгэр Орхон аймгийн гүүрнээс зүүн тийш 100 метр газар Хараа голын усанд иргэн Х /20 настай, эрэгтэй/ осолдсон дуудлагаар аврагчид эрэн хайх ажиллагааг зохион байгуулж байна.   Мөн Булган аймгийн Хангал сумын 4 дүгээр багт Сэлэнгэ голын усанд Орхон аймгийн Цагаанчулуут багийн харъяат иргэн М /19 настай, эрэгтэй/ осолдсон байж болзошгүй гэсэн дуудлагаар аймгийн Онцгой байдлын газар, Цагдаагийн газрын  албан хаагчид эрэн хайх ажиллагааг зохион байгуулж байна. Д.Цэцэг