Үндэсний баяр наадмын өдрүүдэд Хүй долоон худагт байрлах Монголын төмөрзамын дарга асан Р.Раашын галаар зочилсон юм. Тэрбээр төмөрзамын хамт олонтойгоо нэг гал болон буудалсан байв.
.
-Та сайхан наадсан уу? Энэ жилийн наадмаар хичнээн морьд сойв?
-Тэнгэр тэтгэж, олон түмэн цэнгэсэн дэлгэр сайхан наадам боллоо. Би энэ жил нилээн хэдэн тооны морьд уясан. Гэхдээ улсын наадамдаа “Ганц морь уралдаач, ганц хүн барилдаач” гэгчээр ганцхан азаргатайгаа ирсэн. Сайн л давхилаа. Бусад нь хөдөө орон нутгийн аймаг сумдын наадмаар уралдах юм. Миний төрсөн нутаг Дундговь аймгийн Эрдэндалай сумын 90 жилийн ой, миний нутаг гэж хэлж болох Төв аймгийн Дэлгэрхаан сумын 90 жилийн ойн хурдан морины уралдаанд хурдлуулна даа.
.
Хүй долоон худаг өмнөх жилүүдээс илүүтэй өнгө засч, тохижсон гэдгийг наадамчин олон хэлж байна. Таны хувьд?
-Тийм юм шиг байна. Би жинхэнэ тохижилт хийсэн газруудаар нь явсангүй. Харин зүүн хойгуур шинэ зам тавьсан байна гэж ойлгосон.
.
-Монгол наадмын төвийг Хүй долоон худагт барина гэж яригдаж байгааг юу гэж бодож байна.
-Мэдэхгүй юм. Надаас дээгүүр нилээн ухаантай хүмүүс бодсон болохоор зөв л байгаа байлгүй. Харин олон түмнээсээ жоохон холдчихож магадгүй. Унаа тэрэгний асуудал гээд наашаа явах нилээн хүндрэлтэй байдаг. Гэхдээ ухаантнууд бодож байгаа хойно мэдэж байгаа байлгүй, би юу гэхэв.
.
-Монгол түмэндээ хандаж хэлэх үг?
-Дэнж хотойж, дэлхий дэлгэрсэн сайхан наадам боллоо. Олон сайхан хүлгүүд шандас сорьлоо. Урд нь сураг нь дуулдаагүй хурдан хүлэг морьд уралдлаа. Аймаг сумдын ойн баярууд үргэлжилнэ. Тийм болохоор монголчууд минь зон олноороо утга төгөлдөр сайхан наадаарай.
П.Наран
Гэрэл зургийг Б.Мөнх-Эрдэнэ