Ажилласан жил, тэтгэврийн даатгалын шимтгэлийг нөхөн тооцох тухай хуульд хамрагдахаар улсын хэмжээнд 298 мянга 659 хүн бүртгүүлсэн байна. Уг хуульд хамрагдах хүсэлтэй иргэд  ирэх сарын нэгнийг хүртэл Дүүргүүдийн Нийгмийн даатгалын хэлтэст бүртгүүлэх юм. Үүнтэй холбоотойгоор  тус байгууллагаар үйлчлүүлэх иргэдийн тоо эрс өсч, ачаалал нэмэгдсэн байна. Тодруулбал, дүүргүүдийн Нийгмийн даатгалын хэлтэст ойролцоогоор нэг өдөрт 300-600 гаруй хүнд үйлчилж байгаа аж.

Хуульд хамрагдах хүсэлтэй иргэн хөдөлмөрийн дэвтрийн хуулбар, оршин суугаа газрын тодорхойлолт, ажилласан хугацааг нь тооцох баримтгүй болсон иргэний ажилласан хугацааг шүүхээс тогтоосон бол уг шүүхийн шийдвэр, өргөдөл зэрэг бичиг баримтыг бүрдүүлж очих ажээ.

Энэхүү хуулийн зорилт нь өөрөөс  үл хамаарах шалтгаанаар 1990-1995 оны хооронд ажил, хөдөлмөр эрхлээгүй буюу эрхлэх боломжгүй байсан иргэний ажилласан жил нь тасарсан хугацааг ажилласнаар нөхөн тооцох, 1995-2000 оны хооронд нийгмийн даатгалын шимтгэл нь төлөгдөөгүй буюу төлөх боломжгүй байсан иргэний даатгуулагч өөрөө төлөх 10 хувийг тухайн онуудын хөдөлмөрийн хөлсний доод хэмжээнээс тооцож төлүүлэн нийгмийн даатгалын шимтгэлээ төлсөнд тооцуулахад чиглэгдэж  байгаа юм.

Б.Одон