Францын “Арева” групп Дорноговь аймгийн Улаанбадрах суманд өөрийн охин компани болох “Кожеговь” компани ураны хайгууль явуулж, олборлолтын өмнөх шатанд хүрээд байгаа юм. Үүнтэй холбоотойгоор Монголын ногоон нам “Арева”-г шүүхэд өгөхөөр болсон талаар мэдээлэл цацагдах болов. Энэ талаар Монголын ногоон намын дарга О.Бум-Ялагчаас тодрууллаа.

.

-Танай нам “Арева” группыг шүүхэд өгч байгаа гэж сонслоо. Энэ үнэн юм уу?

-Тиймээ. Бид Дорноговь аймгийн Улаанбадрах суманд ураны хайгууль явуулж, олборлолтын ажил хийдэг “Арева” группын охин компани болох “Кожеговь” компанийг олон улсын шүүхэд өгөхөөр хөөцөлдөж байна. Үүнийг мэдсэн тус компанийнхан үйл ажиллагаагаа зогсоогоод байгаа. Бодвол нутгийн иргэдийн бухимдлыг намжтал үйл ажиллагаагаа түр зогсоосон байх. Учир нь олон улсын шүүх тухайн орон нутгийн иргэдийн саналыг харгалзаж үздэг.

.

-Одоогийн байдлаар хэдэн иргэн хохироод байна вэ?

-Сүүлийн хагас жилд хайгуулийн талбайн орчимд мал адгуус үхэж, малчдын санааг зовоож байна. Одоогийн байдлаар Улаанбадрах сумын 340 гаруй иргэн хохироод байгаа. Цаашид хэд болж өсөхийн мэдэхгүй. Тиймээс манай Ногоон нам болон бусад иргэний хөдөлгөөнүүд эсэргүүцэж мал хорогдож буй шалтгааныг ураны үйл ажиллагаатай шууд холбоотой гэж үзэж, компанийн тодорхой бүс дэх үйл ажиллагааг зогсоохыг удаа дараа шаардсан.

.

-“Арева”-гийн удирдлагууд нутгийн иргэдтэй өнөөдөр уулзалт хийж байгаа гэсэн шүү дээ?

-Тийм. “Арева”-гийн удирдлагууд өнөөдөр нутгийн иргэдтэй уулзалт хийж, тэдний тархийг угаах гэж байна. Уг уулзалтаараа “Кожегоби” компанийнхан үйл ажиллагаагаа орон нутгийн иргэдэд дэлгэрэнгүй танилцуулж, цаашид хийж, хэрэгжүүлэх ажлаа тайлагнах юм гэнэ лээ. Тэдний зохион байгуулж буй энэ үйл ажиллагаа нь нутгийн иргэдийн санаа сэтгэлийг түр зуур аргацаах арга. Иргэдийг тайвширсны дараа ахиад л ураны олборлолтоо хийх болно.