Өндөр өсгийтөөр ижилсэж, дуулж бүжиглэдэг Украйны алдарт хамтлаг “Казаки” хамтлаг ирэх сарын 2-нд манай улсад хүрэлцэн ирэх юм. Тэд “Мотив” хамтлагийн ахлагч

Дэлхийн хөгжмийн ертөнц өдрөөс өдөрт өөрчлөгдөн хувьсаж байгаагийн илрэл болсон “Казаки” хамтлагийн  талаар маш олон таамаглал, элдэв хэл ам тасардаггүй. Учир нь өндөр өсгийтийг эмэгтэйчүүд эсвэл билгийн чиг хандлага өөр хүмүүс л өмсдөг гэдэг. Нөгөө талаар 10-15 см өндөр өсгийт өмсөж, орчин үеийн бүжгийн хэмнэлийг гайхалтай чадварлаг хослуулж чаддаг нь олны анхаарлыг татаж, тэднийг чухам хэн бэ гэсэн маргаан дагуулдаг аж. Энэ сарын 12-нд АНУ-ын MTV хөгжмийн нэвтрүүлэгээс  тус хамтлагийг онцлон ярилцлага авсан байна. Энэхүү ярилцлагыг хүргэж байна.

.

-Казаки хамтлагийн гол онцлог бол өндөр өсгийт, царайлаг сайхан залуус гэж бодож байна?

-Тиймээ. Дэлхий ертөнцөд олон дуучин бий. Нуулгүй хэлэхэд, нэг нэгнээсээ хуулбарлаад сайн дуучин гэж хэлүүлээд явж байгаа нь цөөнгүй. Харин бид хэнийг ч дахин хувилахгүйгээр тайзан дээр анх гарч эхэлсэн. Анх хүмүүс үгийн муухайгаар хэлэх нь их байсан ч гэсэн бас бидний талд зогсох олон хүн байсныг нуугаад яахав. Хэрвээ өндөр өсгийтгүй тайзан дээр гарсан бол “Жирийн” хамтлаг л байх байсан. Бид өндөр өсгийтийн ачаар л гялалзаж байгаагаа хэний ч өмнө бардам хэлнэ. Хөөрхөн гэдгээ бид мэднээ. /Инээв/.

.

-Энэ өндөрлөгт гаргахын тулд хэдэн жилийг зарцуулав? 

-Цаг завгүйгээр 10 жилийг өөрсдөөсөө хассан. Бид үргэлж амжилтад хүрнэ гэдгээ мэддэг байсан учир цаг заваа үргэлж хянаж, цагддаг байлаа. Тайзан дээр шинэ өнгө гаргаж ирэхийн тулд хоолоо хүртэл хасдаг байсан. Бид чинь эр хүн учраас хүссэнээрээ байхыг ямар их мөрөөддөг байв аа. Тэгэхдээ хүн гэдэг чинь өөрсдийгөө цагдаж л байж амжилтад хүрдэг учраас бага зэргийн хөлс, нулимс бол юу ч биш.

.

-Өндөр өсгийт дээр амьдрах ямар байна?

-Бидний стайл бол хүүхнүүд хүртэл халшираад өмсөж чаддаггүй өндөр өсгийт. Чи зөв асуултыг зөв хүмүүстээ тавилаа. Бид бол яахын аргагүй “Өндөр өсгийт дээр амьдрагчид”. Биднээс өөр ийм алхам хийсэн хүн одоогоор тайзан дээр алга гэдгийг бардам хэлмээр байна.

.

-Их сонирхолтой хэмнэлээр хариуллаа. Охид та нартай уулзах юм бол энэ асуултыг заавал тавиарай гэсэн. Та дөрвийн хэдэн нь эхнэр, найз охинтой вэ?

-Бүгдээрээ. Манай хамтлагийн гурав нь аав болсон. Хүмүүс биднийг ижил хүйстэн гэж боддог юм байна лээ. Шууд хэлэхэд, бид дөрөв “бэлгийн цөөнх” биш.

.

-Аав гэнээ. Та хэдийг эхнэр хүүхдүүд чинь яаж хүлээж авдаг вэ?

-Урлагийн хүнтэй амьдарч байгаа бол сэтгэлийн хаттай байх хэрэгтэй. Бид олон сар гэрээсээ хол аялан тоглолт, шоу энэ тэр гээд дуулах газраар явах нь их байдаг. Тайзан дээр өндөр өсгийт, бариу хувцас өмсөөд дуулсныхаа дараа жинхэнэ эр хүн болцгоон гэртээ ордог гэдгийг санах хэрэгтэй. Бид дандаа ийм байдалтай амьдардаггүй. Байр сууриа хадтай адил болгохын тулд их хичээх хэрэгтэй. Гэр бүл байтугай олон хүн тэгэж бодсон ч бид нар тоохоо өнгөрсөн.

.

-Казаки хамтлагийн дуу ихэвчлэн үг багатай, хөгжим, бүжиг ихтэй санагддаг?

-Бид мэргэжлийн дуучин биш. Бүгдээрээ бага наснаасаа эхэлж балет сонирхон, түүгээр амьдарч яваа хүмүүс. Тиймээс “electro dance” чиглэлээр дуулах нэг арга байсан гэж хэлэх үү дээ.

.

-Аль улсаас гаралтай вэ?

-Орос. Их сайхан орон шүү.

.

-Барууны хөгжмийн урсгалаас хэнийг сонсч, дуурайх дуртай вэ?

-Рианна. Тэр бол үгээр илэрхийлэхийн аргагүй сайхан хүүхэн. Тэрний дуу бол жинхэнэ утгаараа тайзан дээр бөмбөг тэсэлдэг гэж хэлмээр байна.

.

-Мадоннатай хамтран дуулж байсан. Казаки хамтлагийн талаар сэтгэл өндөр байсан талаараа олон газраар ярьж байхыг сонссон. Хамтрахад хэр байсан?

-Тэр бол гал шиг, бага зэргийн галзуу.

.

-Хэдэн см-ын өсгийтэй гутал өмсдөг вэ?

-Бэлтгэлийн үеэр 10 см, тайзан дээр бол 12-15 см өсгийтэй гутал өмсдөг.

.

-Хөл чинь өвддөг л биз дээ. Хүүхнүүд бид чинь өдөржингөө өмсөөд маргаашнаас харахаас дургүй хүрдэг?

-Өвдлөө гээд яах билээ дээ. Тайзан дээр өндөр өсгийтгүй гарвал Казаки биш болно биз дээ. Бидний брэнд юм чинь. Утга учраа хамгаалах л хэрэгтэй.

.

-Анх тайзан дээр хэн чинь өсгийтэй гуталтай гаръя гэж санаа гаргав?

-Манай студи. Бид нэг иймэрхүү чиглэлийн хамтлаг гаргамаар байна гэсэн санал бидэнд тавьсан. Хамгийн чухал нь эрэгтэйлэг бус эмэгтэй хандлагатай. Анх сонсоход их сонин санагдаж байсныг нуугаад яахав. Тэгэхдээ таалагдсан шүү яваандаа.

.

-Казаки хамтлагийнхан хэдэн настай вэ?

-22-25 настай. Нэг үеийнхэн.

.

-Ойролцоогоор хэдэн уран бүтээл гаргав?

-10-аас дээш дуугаа клипжүүлсэн. Нэг CD гаргахаар төлөвлөж байна.

Б.Дэлгэрцэцэг