Монгол Улсын Ерөнхийлөгч Ц.Элбэгдорж МАХН-ын дарга Н.Энхбаярт уучлал үзүүлэх зарлигт өчигдөр гарын үсэг зурсан. Өмнөх өдөр нь Ерөнхийлөгч Ц.Элбэгдорж “Өглөөний мэнд. Хүн өглөгч сэтгэл, хайр энэрэлээс үүссэн гэж зүүдэлж сэрлээ” хэмээн твиттер хуудснаа жиргэсэн байдаг. Хэдийгээр “Хууль бүх хүнд тэгш үйлчлэх ёстой. Зөвхөн Н.Энхбаяр гэдэг хүнд үйлчилдэг, ганц хүнд зориулсан хууль гэж байхгүй” гэсэн байр суурийг илэрхийлсээр ирсэн Ерөнхийлөгч маань ийнхүү “зүүднийхээ тайлал” болгож 2.6 жилийн ял сонсоод байсан МАХН-ын дарга Н.Энхбаярт уучлал үзүүлсэн юм. Уучлалт үзүүлсэн зарлиг гарсан даруйд Н.Энхбаярын ар гэрийнхэн хийгээд намын гишүүд, дэмжигчид түүний хэвтэн эмчлүүлж байгаа Клинкийн нэгдсэн II эмнэлэгт ирцгээсэн. Тодруулбал, гэргий О.Цолмон, хүү Н.Батшугар, УИХ-ын дэд дарга Л.Цог, Шадар сайд Д.Тэрбишдагва, Эрүүл мэндийн сайд Н.Удвал, УИХ-ын гишүүн З.Баянсэлэнгэ, О.Баасанхүү тэргүүтэй хүмүүс намынхаа даргатай уулзахаар ирцгээв.   Мөн ШШГЕГ-ын харьяа Хорих 401 дүгээр ангийнхан тус эмнэлэгт ирж Ерөнхийлөгчийн уучлалт үзүүлсэн зарлигийг Н.Энхбаярт танилцуулсан. Харин екс ерөнхийлөгчид уулчлалт үзүүлсэн зарлиг “таалагдсангүй”. Тэрбээр “Би уучлуулах ямар нэг буруу зүйл хийгээгүй” хэмээн гэдийсэн. Эгээ л нөгөө өнгөрсөн оны дөрөвдүгээр сард АТГ Н.Энхбаярт яллагдагчаар татах тогтоолыг танилцуулж байхад чихээ даран эсэргүүцлээ илэрхийлж байсан шиг юм болох шахсан. Гэхдээ тэрбээр уучлал үзүүлсэн зарлигийг алга тосон хүлээж аваагүй ч өчигдөр оройдоо эмнэлгээс гарч гэрийн зүг явсан билээ. Энэхүү үйл явдал зарим хүмүүсийн хувьд гэнэтийн зүйл байсан бол харин нөгөө хэсгийнхэн хувьд ойлгомжтой зүйл байсан гэх өнгө аястайгаар хүлээж авсан юм. Угаасаа ойлгомжтой АН-ын МАХН-тай хийсэн сонгуулийн тохирооны нэг хэсэг хэмээн зарим хүмүүс үзэж буй. Үүнийгээ ч олон нийтийн сүлжээгээр илэрхийлж байлаа. Учир нь өнгөрсөн сард АТГ-ынхан Н.Энхбаярын гэрт нэгжлэг хийх үеэр МАХН-ын хуульч гэх Л.Эрдэнэтуул “АН-ынхан үүрэг хүлээж, Н.Энхбаяр даргад эмчлүүлэх боломж өгнө, улмаар цагаатгах талаар бидэнтэй ярилцсан. Гэтэл хэлсэн үгэндээ хүрсэнгүй. Тийм болохоор АН-ынханд хандаж, та нар ичээчээ хэлсэн ярьсандаа эр хүн шиг хүрээч ээ” хэмээж ярилцлага өгч байсан билээ.   Харин нэгэнт суллагдсан даргаа харсан тус намынхан тохироо байгаагүй гэж гүрийсэн юм. Тэрний нэг нь УИХ-ны гишүүн О.Баасанхүү. Тэрбээр “Бид хэзээ ч уучлаач гэж царай алдаагүй. Н.Энхбаярт өршөөл үзүүлэх биш түүнийг цагаатгах ёстой байсан юм. Харамсалтай нь түүний биеийн байдал өдөр ирэх тусам доройтож байгаа тул Ерөнхийлөгчийн зарлигийг хүлээж авахаас өөр аргагүй. Түүнээс гадна ямар нэгэн улс төрийн тохироо хийгээгүй гэдгийг албан ёсоор хэлье. Гол нь бид хүнийхээ эрүүл мэндийг л бодож байна” хэмээн даналзсан юм. Дахин сонгогдсон Ерөнхийлөгч тангарагаа өргөөд сар гаран болоод л Н.Энхбаярын үлдсэн ялыг уучлан суллах шийдвэр гаргасан нь хүмүүсийн хардалтыг улам нэмэгдүүлсэн. Түүнчлэн хүмүүсийг ойлгохгүй байгаа нэг зүйл нь Н.Энхбаяр уучлал хүссэн өргөдөл өгөөгүй байхад уучилсан явдал юм.   Учир нь Монгол Улсын Ерөнхийлөгчөөс уучлал үзүүлэх журам, 1991 оны гуравдугаар сарын 18-ны өдрийн 5 тоот захирамаар батлагдсан “Монгол Улсын Ерөнхийлөгчөөс уулчлалт үзүүлэх болон уучлал хүссэн өргөдлийг хянан шийдвэрлэх журам” гэж бий. Хуулиар тухайн ял эдэлж буй этгээд, эсвэл түүний ар гэрээс уучлахыг хүссэн өргөдлийг Ерөнхийлөгчид хандан гаргаж, түүнийх нь дагуу Тамгын газраас нь судалж хянасны дараа Ерөнхийлөгч уучлал үзүүлэх зарлиг гаргадаг. Энэ хууль журмын дагуу л Н.Энхбаярт уучлал үзүүлсэн байх учиртай. Гэтэл Н.Энхбаяр нь өргөдөл өгөх нь битгий хэл уучлалаа гээд байхад уучлуулах юм хийгээгүй шүү хэмээн гүрийгээд байгаа явдал юм. Хэрэв Н.Энхбаяр өргөдөл өгөөгүй юм бол ар гэрийнхэн нь өргөдөл бичсэн байж магадгүй хэмээх хүн ч байсан юм. Эс бөгөөс намынхных нь яриад байгаа шиг хоёр талын сонгуулийн тохироо нь одоо биелэлээ олж байгаа хэрэг болов уу.  Ямартай ч МАХН-ыхан уухай түрлэг, ура хашгиралтаар даргаа угтан авсан билээ.   Өчигдөр гэнэт өрнөсөн энэхүү үйл явдал олон нийтийн сүлжээгээр хуурай өвсөнд тавьсан гал мэт хурдан тархаж, нам гүмхэн байсан жиргээчдийг амь оруулсан гэхэд болно. Үйл явдлыг өөр өөрийн өнцгөөс янз бүрээр тайлбарлаж байв. Тухайлбал, “Одоо байгаа улстөрчдөөс Н.Энхбаярт улс төрийн өргүй, хувийн барьцаагүй хүн цөөхөн. Түүнийг эргэж ирэхгүй мэт загнасан хүмүүс хагас нойртой хонох нь”, “Үүнээс хоёр зүйл ойлголоо. Тэр хүний албан тушаалыг хүндэтгээд уучилсан хүнлэг сайхан л үйл явдал боллоо. Нөгөө нь авлигатай бас уучилж тэмцэж болдог юм байна”, “МАХН-ынхан засагт орсон зорилгоо биелүүллээ. Тэдний хувьд эхний үе дууслаа”, “Уучлалт, өршөөл хоёр ялгаатай. Ерөнхийлөгч нэг иргэний хүсэлтийг уучлалаар шийддэг, УИХ хуулиар тодорхой гэмт хэрэгтэнд ершеел үзүүлдэг”, “Энхбаяр гэмт хэрэгтэн биш цагаадах ёстой юм бол би Далай лам Бурхан будда байна”, "Гэхдээ Н.Энхбаярыг заавал архи зардаггүй өдөр суллаж байгаа байхгүй юу. Ха ха ха" гэх мэт олон сэтгэгдэл урсч байлаа.  Д.Цэцэг