Өнгөрсөн баасан гаригт Г.Эрхэмбаяр аваргын ээж Т.Даваадулам гуайд Сэлэнгэ аймгийн Засаг даргын Тамгын газраас “Аймгийн хүндэт иргэн” өргөмжлөл хүртээсэн юм. Энэ үеэр Г.Эрхэмбаяр аваргын ээж Т.Даваадулам гуайтай хэсэг хором хөөрөлдлөө. Тэрээр таван сайхан хүүхэд төрүүлж, өсгөжээ.

.

-Юуны өмнө танд Монгол Улсын аварга хүү төрүүлж өсгөсөнд баяр хүргье?

-Баярлалаа. Өнөөдөр хүүгийн маань цолны мялаалга наадам үнэхээр сайхан болж байна. Хүүгээрээ их бахархаж байна. Сайхан барилдаад түрүүлэх дөхөөд ирэхээр баярлаж, бахархалгүй яах вэ. Одоо ч гэсэн тэр сэтгэл минь дундрахгүй л байна даа. Бас ганц хүүгээрээ бахархах биш түүнд туслаж дэмжиж байдаг багш дасгалжуулагч, нутгийнхан гээд бүх хүнд баярлаж байна. Аав нь өнөөдөр бидэнтэй хамт байсан бол хичнээн баярлах байсан бол гэж бодогдож байна. Аав нь л түүнийг төрсөн цагаас нь эхлээд л бөх болгоно гэж ярьсаар байгаад хожим аавынхаа хүслийг дагаж бөхийн спорттой холбогдсон хүүхэд.

.

-Аварга багадаа ямар хүүхэд байсан бэ?

-Миний хүү их даруу төлөв хүүхэд байсан. Өөрөө нэг зүйлийг хийнэ гэж зүтгэсэн л бол заавал түүнийгээ биелүүлдэг. Үр дүнг нь заавал үзэх гэж шантрахгүй хичээдэг хүүхэд байлаа. Г.Эрхэмээ маань аав ээжийнхээ үгнээс гардаггүй ажилч хичээнгүй хүүхэд байсан. Хүү минь энэ сайхан амжилт гаргахад миний арга ухаан гэж юу байх вэ дээ. Аав нь л хүүгээ бөх болгох гэж их хичээсэн. Тэр хичээл зүтгэл нь ч биеллээ олж аварга хэмээх сайхан цолыг хүртлээ.

.

-Хоёр жилийн өмнө арслан цол хүртэхэд, бас энэ жил түрүүлж аварга цол хүртэх тэр мөчид танд ямар сэтгэгдэл төрж байсан бол?

-Гэртээ бөх үзээд сууж байтал хүү маань даваа өгсөөд барилдаж эхэлсэн. Эх хүн болсон хойно түрүүлчихээсэй гэж дотроо битүүхэн горьдож л суулаа. Даваандаа ханаагүй байгаа байх, яаж барилдах юм бол гэж бодож байсан. Би хангай дэлхийдээ залбирч, сүүгээ өргөж л суулаа.

.

-Сайхан хүү төрүүлж өсгөсөн учраас нутгийнхаа хүндэт иргэн боллоо?

-Би эгэл жирийн ажилчин ангийн хүн. Ямар ч байсан үүрэгт ажлаа хариуцлагатай хийхийг хичээж явлаа. Эх баригч мэргэжилтэй. Эх үр хоёрыг эсэн мэнд хоёр яс салгах гэж олон жил хичээж явсан. Сайхан хүүгийхээ ачаар Сэлэнгэ аймгийн хүндэт иргэн боллоо.

.

Б.Одон