“Бээжин 2008” зуны XXIX олимпийн наадмын боксын төрлийг МҮОНРТ-ээр Боксын холбооны Ерөнхий нарийн бичгийн дарга, МУГТ Т.Үйтүмэн нэвтрүүлэгч нарын хамт тайлбарлан үзэгч олонд хүргэсэн билээ. Түүний “илүү илүү” гэж хэлэх нь зарим үзэгчийн хэлэх дуртай үг болоод байгаа билээ.

.

Тэгвэл цагтаа Монгол Улсын нэрийг тив дэлхийд гаргаж явсан МУГЖ Т.Үйтүмэн амралтаа төрсөн нутагтаа гэр бүлийн хамт өнгөрүүлж байна. Тэрбээр зүгээр ч нэг амарсангүй, Сэлэнгэ нутгаас гарсан анхны аваргынхаа мялаалгын наадмын зохион байгуулах комисст орж ажиллажээ. Энэ тухайгаа наадмын үеэр хэвлэлийнхэн бидэнд дуулгаж амжсан юм.

.

Т.Үйтүмэн гавъяатын гэргийг О.Отгонжаргал гэдэг. О.Отгонжаргал хатагтай өдгөө Азийн боксын эмнэлгийн холбооны гишүүнээр ажилладаг эмч, тамирчин гэх хос мэргэжилтэй.

Дунд сургуульд байхаасаа үерхэж, дотноссон тэд Хүслэн, Түмэнжаргал, Ерөөлт-Үйлс хэмээх хоёр хүү, нэг охинтой гэнэ лээ.

.

Дашрамд дуулгахад, Т.Үйтүмэн гавъяат Сэлэнгэ аймгийн Шаамар сумын  хүүхэд. Багадаа тэрбээр найзууд дундаа “Дэлдэн шар”, “Цахилгаан шар” гэх хочтой байсан гэдэг. Анх 1990 онд Улаанбаатарт хөл тавьж, ардын багш, гавъяат дасгалжуулагч Д.Бандитай танилцан бокстой амьдралаа холбосон юм гэнэ лээ. Тэр цагаас хойш бүтэн үеэрээ тасраад байсан Монголын боксын нэр хүндийг Т.Үйтүмэн залган гарч иржээ.

Тэрбээр 1995 онд тэрээр Ази тивийн аварга, 1997 онд Дэлхийн аваргаас мөнгөн медаль авчирч байсан юм.

Б.Одон

Гэрэл зургийг Б.Бат