Нэг хэсэг үнэ нь өсөөд байсан төмс, хүнсний ногооны үнэ эхнээсээ буурчээ. Засгийн газрын 268 дугаар тогтоолын дагуу одоогоор нийслэлийн 6 дүүргийн 28 цэгт 247 лангуу барихаас 110 лангуу нь бэлэн болсон байна. Тодруулбал, дүүрэг бүрт 4-6 лангуу барьж, ногоочдоос шууд хэрэглэгчийн гарт төмс, хүнсний ногоогоо нийлүүлэх аж. ҮХААЯ-наас мэдэгдэж буйгаар одоогийн байдлаар 3.2 мянган тонн төмс хүнсний ногоог түүвэрлэн хураасан бөгөөд энэ сарын дундуур ургац хууралт жигдэрвэл үнэ нь цаашид буурсаар байх юм байна. Мөн нийслэлд байгуулагдаж буй дээрх лангуунуудыг салбарын яамнаас санхүүжүүлэн бариулж буй тул бусад худалдааны төвүүдэд борлуулагдаж байгаа төмс, хүнсний ногооноос хямд үнэтэй байх боломж бүрджээ. Ногоочдын зүгээс ашигласан тог, гарсан хог хаягдлын мөнгөө л өөрсдөөсөө гаргах юм.

Шинэ ургацын төмс, хүнсний ногооны үзэсгэлэн худалдаа аравдугаар сарын 20 хүртэл үргэлжлүүлэхээр төлөвлөөд байгаа ч хэрвээ цаг агаар цаашид дулаан байвал ногоочид ногоогоо борлуулсаар байх аж. Түүнчлэн шинэ ургацын төмс хүнсний ногоог хэрэглэгчдэд их хэмжээгээр борлуулах үүднээс есдүгээр сарын дундуур “Алтан намар” уламжлалт үзэсгэлэн худалдааг зохион байгуулахаар салбарын яам бэлтгэл ажилдаа оржээ.

А.Энхжаргал