Үндэсний их баяр наадмын өдрүүдэд Хүй долоон худагт худалдаа наймаа эрхлэгчид эмх замбараатай байрлаж, наадамчин олны ая тухтай байдлыг хангахад зохион байгуулагчдын зүгээс ч нилээдгүй хичээл зүтгэл гарсан гэдэг.

₮

Тэгвэл өчигдөр Хүй долоон худагт “Монгол морь-3000” арга хэмжээ эхэлж, 10 мянган морьтны жагсаал болсон. Харин өнөөдөр 3000 морьтны уралдааныг зохион байгуулж буй. Монгол Улсын ерөнхийлөгчийн ивээл дор Засгийн газар, Монголын морин спорт, уяачдын холбооноос хамтран зохион байгуулж буй энэхүү арга хэмжээний төгсгөлд дэлхийн дээд амжилтыг тогтоосон хэмээн Гиннест бүртгэх юм.

₮

Харин уг арга хэмжээнд оролцогчид болоод үзэгчдэд идэж уух, өмсөж зүүх бүхий л зүйлийг худалдах наймаачид эгээ л Нарантуулыг нүүлгэсэн мэт байх аж. Тэр ч бүү хүү хэл морь эргэхийг хүлээн уйдаж зогсох нэгнийг аятайхан зугаацуулчих тоглоом наадгай ч цөөнгүй. 1000 төгрөгөөр 10 бөмбөлөг оновол хамгийн дээд шагнал нь Galaxy  өгнө ч гэх шиг. Хамгийн сонирхолтой нь 1000 төгрөгөөр дөрвөн ширхэг жигнэмэгийг 1 минутанд багтаан идэж чадвал 10 мянган төгрөг өгнө гэсэн бооцоо. Харин ингэж жигнэмэг идэхдээ ус огт уухгүй гэсэн дүрэмтэй гэнэ. Гэвч энэхүү болзлыг хангаад 10 мянган төгрөг авчихсан аавын хүү гараагүй гэнэ шүү. Энэ мэт олон сонирхолтой, гайхаш төрүүлэм худалдаа наймаа нүд эрээлэн Хүй долоон худагт хоёр өдрийг өнгөрөөж байна.

₮

Манайхан сүүлийн жилүүдэд Гиннесээр “өвчлөөд” байгаа. Гиннес нь энэ дэлхийн хамгийн сонин содон үйл явдал, олон хүнийг хамарсан арга хэмжээ, хүний элдэв хачин гаж үйлдлийг номын хуудсандаа мөнхөлдөг. Тиймээс дэлхийн хаана ч байхгүй арга ухаанаар мөнгө олж чаддаг монгол наймаачдын “суу заль”-ийг Гиннест бүртгүүлчихэд ч буруудахгүй мэт санагдана.

₮

П.Наран

Гэрэл зургийг Б.Мөнх-Эрдэнэ