Бороо их орсонтой холбоотойгоор өнгөрсөн долоо хоногт төмс, хүнсний ногооны хураалт түр зогссон талаар өнөөдөр Үйлдвэр, хөдөө аж ахуйн яам /ҮХААЯ/-ны Газар тариалангийн бодлогын хэрэгжилтийг зохицуулах газар /ГТБХЗГ/-аас мэдэгдлээ. Одоогоор төмс, хүнсний ногооны түүвэрлэн хураалт хийгдэж байгаа бөгөөд нийтдээ 3.5 мянган тонн ногоо хураан авчээ. Харин хүлэмжнээс нийт 1000 орчим тонн нарийн ногоо хураан авсан байна.

Засгийн газраас энэ жил Нийслэлийн зургаан дүүрэг 28 цэгт 247 лангуунд шинэ ургацын төмс, хүнсний ногоо борлуулахаар болсон. Өнөөдрийн байдлаар “Баянзүрх”, “Скай”, “Цамбагарав” худалдааны төв, Урт цагаан зэрэг газарт нийтдээ 71 лангуу нээж, шинэ ургацын ногоог борлуулж байна.  Дээрх үзэсгэлэнг өнөөдөр 14 цагаас Цамбагарав худалдааны төвийн үүдэнд “Шинэчилж шийдье” нэртэйгээр нээх юм.

ҮХААЯ-ны ГТБХЗГ-ын ахлах мэргэжилтэн Б.Оюунсувдын ярьж буйгаар нийтдээ 9 аймгийн 25 сумын 110 хоршооноос Улаанбаатарт гарах шинэ ногооны үзэсгэлэнд оролцох мэдүүлгээ ирүүлжээ. Баян-Өлгийн зэрэг холын аймгуудын тухайд зөвхөн ирэх сард болох “Намрын ногоон өдрүүд” үзэсгэлэнд оролцох аж. Мөн хөдөө орон нутгуудад ч шинэ ургацын ногооны үзэсгэлэн худалдааг зохион байгуулахаар төлөвлөжээ.

А.Энхжаргал