Ш.Батхүүд эрүүгийн хуулийн 233.2-т зааснаар эрүүгийн хэрэг үүсгэн шалгаж эхлээд байна. Мөрдөн байцаалтын шатанд цагдан хорих шаардлагатай гэж үзвэл саатуулах  аж.

Хэргийг эргэн сануулбал, 2009 онд “Жаст” группийн захирал Ш.Батхүү Английн “Стандарт” банкны Өмнөд Африк дахь салбараас Эрдэнэт үйлдвэрийг барьцаалж их хэмжээний ам.доллар зээлсэн хэрэг мандаж эхэлсэн. Эл хэрэгтэй холбоотойгоор тухайн үеийн “Эрдэнэт” үйлдвэрийн захирал Ч.Ганзориг Улсын мөрдөн байцаах газрын Эдийн засгийн гэмт хэрэгтэй тэмцэх хэлтэст өнгөрөгч тавдугаар сараас эхлэн шалгуулж  эхэлсэн юм.

Өөрөөр хэлбэл, “Эрдэнэт” үйлдвэрийн захирал асан Ч.Ганзориг албан тушаалаа урвуулан ашиглаж “Жаст” группийн захирал Ш.Батхүүг их хэмжээний зээл гадны банкнаас босгоход тусалсан хэрэгт сэжигтнээр тооцогдон шалгуулж байгаа юм.

Хэрэг явдлыг сийрүүлбэл, “Стандарт” банкнаас нийтдээ 109 сая ам.долларыг “Жаст” группийн  захирал Ш.Батхүү гурван үе шаттайгаар зээлж авчээ.

Гэвч зээлээ графикийн дагуу төлөөгүй учраас тус банкны ажилтнууд “Эрдэнэт” үйлдвэрийг зорин ирж  зээлээ нэхсэн байна. Энэ үеэс л уг асуудал сөхөгдсөн аж. Ингэхдээ “Стандарт” банкны ажилтнууд  Төрийн өмчийн хорооны дарга Д.Сугар болон “Эрдэнэт” үйлдвэрийн захирал  асан Ч.Ганзоригийн  нарын баталгаат гарын үсэг бүхий зээлийн баталгааг үзүүлж өр нэхэмжилжээ.

 Энэ үед хэргийн эзэн хэнгэргийн дохиур Ш.Батхүү "“Стандарт” банкнаас зээл авахдаа “Эрдэнэт” үйлдвэрийн хуучин удирдлага огт хамааралгүй би тус үйлдвэрийн нэр дээр хуурамч бичиг баримт бүрдүүлсэн" хэмээн гүрийж эхэлсэн нь асуудлыг улам хурцатгасан юм.

 Ингэснээр “Стандарт” банк хариуцагчаар “Жаст” группийн захирал Ш.Батхүүг, баталгаа гаргасан Уулын баяжуулах “Эрдэнэт” үйлдвэрийг  Арбиртийн шүүхэд өгч, нэртэй хуулийн фирмээр өмгөөлүүлэхээр ажиллаж эхэлсэн байна.

Б.Одон