“Шинэ үе” продакшны жүжигчин Г.Ундармаа маш хачин хоббитой. Тэрбээр сувенирийн жижиг сандал цуглуулах дуртай аж. Түүний цуглуулгад янз бүрийн этгээд загвартай сандал байдаг гэнэ. Г.Ундармааг сандал цуглуулах дуртайг нь түүний найз нөхөд андахгүй бөгөөд ямар нэгэн баяраар дандаа жижиг сандал бэлэглэдэг аж. Түүний хувьд гадаад руу явах бүртээ шинэ, шинэ сандал худалдаж авдаг бөгөөд хамгийн үнэтэй сандлаа 100 ам.доллараар худалдаж авч байжээ.

Түүний хобби “Анун” тавилгын дэлгүүрт ажиллаж байсан үетэй холбоотой гэнэ.  Энэ тухайгаа тэрбээр саяхан нэгэн хэвлэлд ярьжээ. Тэрбээр “ Би “Анун” тавилгын дэлгүүрт ажиллаж байхдаа хайртай ханьтайгаа учирсан. Бас сандал цуглуулах хоббитой болсон. Сүүлд Бээжинд явж байгаад жижигхэн чамин сувенирын сандал худалдаж авснаасаа хойш сандал цуглуулж эхэлсэн. Хамгийн үнэтэйг нь Бээжингээс 100 ам.доллар авч байсан. Цуглуулга маань нэлээд өргөжсөн. Яг хэд болсныг тоолж үзээгүй л дээ” хэмээн ярьжээ.

Дашрамд дуулгахад, тэрбээр Нэгдүгээр амаржих газрын хүлээн авах тасгийг бүрэн тохижуулж эхэлжээ.