Шударга өрсөлдөөн, хэрэглэгчийн төлөө газар энэ сарын 17-нд буюу маргааш сэтгүүлчдэд сургалт явуулахаар болжээ.

Тодруулбал, тус байгууллагаас өрсөлдөөний байгууллага чухам ямар үйл ажиллагаа явуулдаг, ямар өргөдөл гомдлыг шийдвэрлэдэг болон өөрийн байгууллагын талаар сургалтыг хийх гэнэ. Өөрөөр хэлбэл, ямар нөхцөлд тус байгууллага хяналт шалгалт хийдэг, ямар зүйлд оролцож болдоггүй зэрэг ойлголтыг сэтгүүлчдэд өгөх шаардлага үүсээд байгаа аж.

Шударга өрсөлдөөн, хэрэглэгчийн төлөө газар нь Засгийн газрын 2004 оны 222 дугаар тогтоолоор Шударга бус өрсөлдөөнийг хянан зохицуулах газар нэртэйгээр Шадар сайдын 17 дугаар тушаалаар байгуулагдаж Шударга бус өрсөлдөөнийг хориглох тухай хууль тогтоомжийн хэрэгжилтэнд хяналт тавин ажиллаж эхэлсэн түүхтэй. Тус байгууллагын даргаар О.Магнай ажиллаж эхэлснээс хойш иргэд энэхүү байгууллагад ам сайтай болоод байгаа юм.

Б.Одон