Нийслэл хотын хаа сайгүй бүтээн байгуулалтын ажил өрнөж, зам барилгын ажил өрнөж байна. Бүтээн байгуулалтын ажлын үр дүнд нийслэл хотын өнгө төрхөнд өөрийн хувь нэмрээ оруулсан барилга байгууламжууд нэмэгдэж байгааг үгүйсгэх аргагүй.  Гэвч  барилга байгууламж барих газрыг хаа хамаагүй олгосоноос хүүхдийн тоглоомын талбай, явган хүний зорчих хэсэг, орон сууцны гэрлийг хааж барьснаас үүдэлтэй сөрөг үр дагавар цөөнгүй гардаг. Хамгийн гол нь чанартай чанаргүй нь үл мэдэгдэх эдгээр барилгууд аюулгүй ажиллагааны дүрмээ стандартын дагуу мөрддөггүй. Барилгын компаниудын аюулгүй ажиллагаанд хяналт тавих ёстой ч төдийлөн сайн хяналт тавьж чаддаггүй гэвэл буруудахгүй биз ээ.

Ямартаа ч, МХЕГ-аас нийтийн эзэмшлийн зам талбай руу түрэн орж, авто машины замтай ойрхон баригдаж байгаа барилгуудад зөвлөн туслах үйлчилгээ үзүүлсэн гэнэ. Эдгээр барилгуудын нэг болох Чингэлтэй дүүргийн V хорооны нутаг “Тэнгис” кинотеатрын дэргэд баригдаж байгаа “Эко”-гийн гэх тодотголтой “MS Building” нэртэй барилга  хамгаалалт хийснийг харж байна.. Өнгөрсөн оны есдүгээр сард 22-хон настай оюутан залуугийн аминд хүрсэн энэ барилга анхнаасаа аюулгүй ажиллагааны дүрмээ дагаж мөрдсөн бол өдгөө хөөрхий залуу аав ээж, анд нөхдийнхөө дунд инээд хөөр бялхаж явах байсан биз ээ. Тиймээс барилгын компаниуд энэхүү хүний амьтай дүйцэх хаалтыг хийж, иргэдийг болон ажилчдынхаа аюулгүй байдлыг хангах үүргээ битгий умартаасай.

П.Наран