Өчигдөр Солонгосын Их хурлаар Хан Ми FTA холбооны ээлжит гэрээг батлах хуралдаан болжээ. Энэ өдөр уг хуралдаанд Минжү намынхан ихэнхдээ оролцоогүй ба Ханнара нам болон бусад бусад  нийт 295  гишүүн оролцож  170 нь зөвшөөрч, 7 эсэргүүцсэнээр Хан Ми FTA холбооны гэрээг 4 жилийн дараа, МБ ерөнхийлөгчийн Засгийн газар болон Ханнара намын гишүүдийн дэмжлэгтэйгээр шинэчлэн баталж байгаа юм. Гэвч энэхүү гэрээг батлахыг эсэргүүцсэн Минжү болон бусад намын гишүүд хуралдааны үеэр эсэргүүцлээ үзүүлэн суудлаасаа босч, Их Хурлын даргын  дэргэд цугларч байсан ба түүнийг  санал хураалтаар гэрээг баталсан тухай мэдэгдсэн даруй Чинбужонгданг намын гишүүн Канг Сон Дунг,  лаазтай  нунтаг нулимс асгаруулагчийг гэнэт задлан  түүний нүүр рүү  цацсан байна. Тэрээр Улсын Их хурлаар Хан Ми FTA холбооны гэрээг  баталсныг эсэргүүцэж байгаагаа илэрхийлэхээр урьдчилан нулимс асгаруулагч бэлдэж ирсэн ба хамгаалагч нар түүнийг танхимаас хүчээр гаргасны дараа Минжү намынхны эсэргүүцэл улам ихэссэн байна. Тус нам энэхүү гэрээг Их Хурлаар баталсан явдлыг  буруушаан түүнийг цуцлах талаар бүх төрлийн арга хэмжээг авахаар мэдэгдээд байгаа бол Ханнара намын дарга  Хунг Жүнг Пю  "Бид энэхүү гэрээг батлахгүй удах тутам жилд 13 тэрбум орчим долларын алдагдлыг хүлээх бөгөөд улс орны өмнө  ийм их хэмжээний алдагдал бий болохыг тооцолгүй эсэргүүцэж байгаа Минжү болон бусад намынхны  дээрх үйлдлүүд үнэхээр бүдүүлэг"  хэмээн мэдэгдээд байна.