"Нарантуул" худалдааны төв дундуур зам тавих нэрийдлээр өнөөдөр, маргааш хоёр өдөр тус захыг амраах шийдвэр гаргасанд бухимдсан түрээслэгчид өнөөдөр мэдээлэл хийлээ.

Тус захын “Түрээслэгч иргэдийн үйлдвэрчний хороо”-ны дарга Ц.Мягмар “Бид зам тавих ажлыг эсэргүүцээгүй. Харин лангуу түрээслэгчдийн хамгийн орлоготой цагт хоёр өдрөөр захыг хааж байгааг эсэргүүцэж байна. Мөн замын ажил эхлэх тухай, урьдчилж мэдэгдээгүй. Иргэдийнхээ санал бодлыг сонсож харилцан тохиролцож шийдвэр гаргах хэрэгтэй” гэлээ.

6

Тэд Улаанбаатар хотын захирагчийн албанд шаардлага хүргүүлсэн боловч хүлээж аваагүй аж. Энэ үеэр тохиролцох тухай буюу захыг хааж зам засах ажлыг хойшлуулахыг ярьсан боловч мөн боломжгүй гэжээ. Энэ тухай Нарантуул захын түрээслэгч Ж.Мэндээ “Ер нь хоёрхон хоногийн дотор шинэ зам барина гэж байхгүй. Замын төлөвлөсөн зураг нь 2,3км зам гэж заасан байсан. Харин Халдвартын эцсээс Нарантуул хүрэхэд нэг км ч хүрэхгүй зайтай. Зам засах нэртэйгээр захыг хоёр сар ч хааж магадгүй. Ийм урт хугацаанд түрээслэгчид орлогогүй суухгүйн тулд Дүнжингарав худалдааны төв рүү нүүж орох боломжтой. Энэ үйл ажиллагаа зохион байгуулалттайгаар хийж байж болох юм. Бидний дунд энэ мэт хардлагууд байна” гэлээ.

6

Нарантуул худалдааны төвд нийт 15 мянга гаруй иргэд лангуу түрээслэн суудаг бөгөөд тэдний 80-90 хувь нь зээлтэй байдаг байна. Өнөөдрийн хувьд тус захын үйл ажиллагаа хэвийн явагдаж байгаа ба зам засварын ажил эхлээгүй байна.

6

Б.Будхүү