Нийслэлийн хэмжээнд урьд шөнө аянга цахилгаантай ширүүн бороо орсон билээ. Үүний улмаас хүний амь нас эрсдэж, гал гарсан гэх мэдээлэл цацагдаж байна. Энэ талаар Нийслэлийн онцгой байдлын газрын  Урьдчилан сэргийлэх асуудал хариуцсан мэргэжилтэн Г.Сэдэдсүрэнгээс тодрууллаа.

-Урьд шөнийн борооноор хүчтэй аянга буужээ. Үүнээс болж хэр хэмжээний хохирол гарсан бэ?

-Өнгөрөгч шөнө Хан-уул дүүргийн  Зайсангийн орчмоор хүчтэй аянга буусан. Гэхдээ үүнээс болж болж хүний амь нас эрсдэж, ноцтой хохирол учраагүй. Харин Баянзүрх дүүргийн 15-р хорооны цахилгааныг түр хугацаагаар хязгаарласан. Гэхдээ энэ хязгаарлалт аянгаас урьдчилан сэргийлсэн ажил байсан.

-Аянганаас болж хэд хэдэн газар галын дуудлага ирсэн юм биш үү?

- Аянганаас болсон галын дуудлага байгаагүй. Өнгөрөгч шөнө галын дөрвөн дуудлага ирсэн. Эдгээр дуудлагууд аянгатай ямар ч холбоогүй. Иргэд хогоо ачуулахгүй, харьяа дүүрэг, хороо нь хогоо цагт нь ачуулаагүйгээс болж, хог шатсан байсан.