ОХУ-ын иргэдийн дунд явуулсан санал асуулгаар интернэт нь телевизийн дараа орох хоёр дахь том мэдээллийн эх сурвалж болжээ. Судалгаанд оролцсон нийт иргэдийн 60 хувь нь телевизээс мэдээллээ авдаг бол 23 хувь нь интернэтээс мэдээлэл авдаг гэж хариулсан байна. Уг судалгааг бүх оросын санал асуух төвөөс явуулсан аж. Телевизээр авч буй мэдээллийн эх сурвалжийг 1991 онтой харьцуулахад телевиз үзэгчдийн тоо нэмэгдсэн байна.

Тухайн үед дэлхий дахинд болж буй явдлын мэдээллийг ОХУ-ын иргэдийн 46 хувь нь авч байсан бол өдгөө 60 хувь болон нэмэгджээ. Санал авсан социологчдын мэдээлж буйгаар сонин долоон хувь бол,  радио таван хувь болж буурсан байна.

Тэгвэл 1991 онд сонины эзлэх хувь 31 байжээ. Судалгаанд оролцогчдын 76 хувь нь 45 хүртэлх насны иргэд байсан аж. Москва, Санкт Петербург хотын иргэдийн 35 хувь нь интернэтээс мэдээллээ авдаг байна. Интернэтэд итгэх болсон гол шалтгаан нь хурдан шуурхай, уншихад хялбар гэж хариулсан байна.

Б.Дэлгэрцэцэг