Нийслэл хотын автозамын түгжрэлийг бууруулах зорилгоор 33 уулзварыг шинэчлэн засварлаж буй. Одоогоор 6 уулзвар ажшиглалтад орсон бөгөөд энэ долоо хоногт 5 уулзварын шинэчлэлийн ажил дуусах юм. Эдгээрээс хамгийн түрүүлж ХӨСҮТ-ийн баруун урд байрлах “Дархан Минж”-ийн уулзварыг өнөөдөр 11.40 цагт албан ёсоор нээхээр болжээ. Нээлтийн ёслолд Ерөнхий сайд болон Засгийн газар, бусад албаны хүмүүс оролцох аж.

Харин дараа нь Гурвалжингийн гүүрний урд байрлах Ажилчны гудамжны, Х хорооллын, Тасганы овооны, Бөхийн өргөөний уулзварууд дарааллан ашиглалтад орно. Эдгээр уулзваруудын өргөтгөл, дэд бүтцийн ажлууд дуусах шатандаа орж, асфальт бетон хучилтаа тодорхой графикийн дагуу хийж байгаа аж. Мөн хучилт дууссан уулзваруудад гэрлэн дохио суурилуулах, авто замын тэмдэг тэмдэглэгээ хийх, явган зорчигчийн зам тавих, орчны бусад тохижилтын ажлуудыг хийж байна.

Эдгээрээс гадна I хорооллын арын замыг Гэмтлийн эмнэлгээс уруудах замтай шууд холбосон шинэ уулзвар гаргаж, өргөтгөх, III, IV хорооллын эцсийн, Циркийн, ТЭЦ-ийн, 25 дугаар эмийн сангийн уулзваруудыг өргөтгөн шинэчлэх, хөдөлгөөний ачаалал ихтэй тодорхой чиглэлүүдэд шинээр зам барих хэд хэдэн ажил хийгдэж байгаа юм.

П.Наран