МСБХолбоо, дэлхийд тэргүүлэгч "PepsiCo international" корпорацийн Монгол дахь албан ёсны төлөөлөгч "ЖИ ЭН БЕВЕРЕЖИС" ХХК нар урт хугацааны гэрээ байгуулан Монголын хүүхэд залуучуудын дунд дөрвөн том лигийг зохион байгуулна хэмээн та бүхэнд мэдээлж байсан билээ. Оюутан залуучуудын амралт чөлөөт цагыг зөв боловсон өнгөрүүлэх, сагсан бөмбөг сонирхдог залуучуудын ур чадварыг нэмэгдүүлэх зорилготойгоор зохиогдож байгаа  PEPSI D league буюу Пэпси хөгжлийн лиг 11 сарын 26-нд эхлэхээр тов нь зарлагдсан бол ЕБС-ын сурагчдын дундах явагдах PEPSI JUNIOR LEAGUE   буюу Идэрчүүдийн АШТэмцээн тун удахгүй эхлэх гэж байна.

ПЭПСИ брэндтэй хамтран өсвөр насны хүүхдүүдийг Архигүй, Тамхигүй, Хоггүй гэсэн уриан дор нэгтгэн, тэдний эрүүл мэнд бие бялдрын хөгжилт, бэлтгэлжилтийг дэмжин хөгжүүлэх, чөлөөт цагийг зөв боловсон өнгөрүүлэх мөн хамт олонч хүмүүжил олгох. Сагсан бөмбөгийн залгамж халааг системтэйгээр бэлтгэж 2012 онд зохиогдох ах дүү хотуудын болон олон улсын тэмцээнүүдэд оролцох авьяаслаг тамирчдыг сонгон авч, монгол улсын өсвөр үеийн шигшээ багийг бүрдүүлэх. Авьяаслаг ирээдүйтэй өсвөрийн тамирчдыг Солонгос улсын сагсан бөмбөгийн сургуульд элсүүлэн, сургахад тэмцээний зорилго оршино.

Тэмцээн нь сургуулийн аварга, аймаг, дүүргийн аварга, УАШигшээ тоглолт гэсэн гурван үе шаттайгаар зохиогдох бөгөөд аймаг, дүүрэг бүрээс тэргүүн байрт шалгарсан багууд шигшээ тоглолтонд оролцох эрхээ авна. Тэмцээнд 1994 оноос хойш төрсөн ЕБСургуулиудын бүх сурагчид оролцох боломжтой бөгөөд багийн бүрэлдэхүүн 10 тамирчин, нэг дасгалжуулагчтай байна. Ур чадвартай шилдэг тамирчин болох үүд хаалга та бүхэнд нээгдэж байна.