Ус, цаг уурын хүрээлэнгээс гаргасан мэдээллээр энэ сарын 29-30-ний өдрүүдэд хөрсөн дээр цочир хүйтрэх төлөвтэй байгаа юм байна. Иймээс болц дутуу таримлыг хяруунаас хамгаалах, төмс, хүнсний ногоог хайрагдахаас сэргийлэх ажлыг эрчимжүүлэхийг хөдөө орон нутагт хүргүүлжээ. Мөн 9 дүгээр сарын 9-10, 19-22-ны өдрүүдэд хур тунадастай, уулархаг нутгаараа цас орох урьдчилсан төлөвтэй байгаа тул ургац хураалтын ажлыг богино хугацаанд хаягдалгүй шуурхай зохион байгуулах шаардлагатай байгаа аж.  Одоогийн байдлаар байгаль цаг уурын давагдашгүй хүчин зүйлийн нөлөөгөөр Сэлэнгэ, Булган, Архангай аймагт нийтдээ 2871 га үр тарианы талбайн ургац мөндөрт цохигджээ.

Ургацын урьдчилсан балансаар энэ жилийн хувьд үр тарианы болц жигд бус, өнгөрсөн жилүүдийнхээс 5-8 хоногоор хожуу байгааг харгалзан нийт талбайн 50-60 орчим хувьд ангилан хадалт хийхээр төлөвлөж, техникийн бэлэн байдлыг хангах шаардлагатай байгаа аж. Мөн үтрэм дээр нойтон тариа бууж, цэвэрлэгээний ажилд хүндрэл учруулж болзошгүй байгааг анхаарч үтрэмийн техникийн бэлэн байдлыг хангах, ажиллах хүн хүчнийхээ тооцоог гарган БХЯ, БШУЯ-д санал тавьж ажиллах хүчний асуудлыг шийдвэрлэх, ургац хураалтад шаардагдах 6 мянган тонн шатахууны нөөцийг бүрдүүлэх, зарцуулалтад  нь хяналт тавьж ажиллах тухайгаа Үйлдвэр, хөдөө аж ахуйн яамнаас мэдээллээ.

А.Жаргал