Сүхбаатар дүүргийн VI хорооны нутаг дэвсгэр буюу МУИС-ийн хичээлийн нэгдүгээр байрны ард байрлах нийтийн эзэмшлийн талбайд "Гацуурт" компани хоёр жилийн өмнөөс барилгын ажлаа эхлүүлсэн билээ. Тэгвэл өнөөдөр нийслэлийн удирдлагууд тус барилгатай танилцсан юм. Энэ үеэр “Гацуурт” компанийн захирал Л.Чинбатаас дараахи тодруулгыг авлаа.

-Танай компанийн барьж буй уг барилгыг “зөвшөөрөлгүй” гэх тодотгол байнга дагадаг. Энэ асуудалд та өөрийн байр сууриа илэрхийлж болох уу?

-Бид энэ барилгыг ямар нэг зөвшөөрөлгүй бариагүй гэдгээ удаа дараа мэдэгдэж байгаа. Хотын дарга Э.Бат-Үүл зөвшөөрөлтэй гэдгийг мэдэж байгаа. Уг барилгын асуудал хоёр ч хотын даргыг дамжин яригдаж байна. Зөвшөөрөлгүй гэх асуудлыг энэ хавийн оршин суугчдын зүгээс гаргаад байгаа.

-Оршин суугчид яагаад ийм асуудал гаргах болов. Та бүхэн эндэхийн оршин суугчидтай уулзаж, ярилцаж үзсэн үү?

-Тэдний толгойг угааж байгаа хүмүүс цаана нь байгаа гэдэгт итгэлтэй байна. Бид оршин суугчидтай уулзах хүсэлт удаа дараа гаргаж байсан. Тэр үед нь эдгээр хүмүүс ирж уулзаагүйгээр барахгүй барилгын зөвшөөрлийг үзье ч гэж ирээгүй шүү дээ. 12 гаруй жил баригдаж байгаа энэ барилгаас болж би хотын захиргаан дээр хэд хэдэн удаа дуудагдсан.

Өмнөх хотын даргын үед 10 гаруй байгууллагын төлөөлөл сууж байгаад энэ барилгыг барих нь зөв, оршин суугчдын эрх ашгийн төлөө барилга барих ёстой гэж шаардсан. Уг шаардлагын дагуу хуучны нэг давхар байшинг буулгаж, ард талын байрны хонгилд байсан бойлерийг манай барилгын доор суулгасан. Учир нь тэд “энэ хавийн оршин суугчдын дулааныг бид хангаж чадахгүй байна. Танай байрны хонгилд бойлерийг нь шилжүүлье” гэсэн. Энэ асуудлаар хотын захиргаатай удаа дараа хуралдаж, бойлерийн энд хийсэн. Хотын захиргаанаас манай барих орон сууцны 70 метр квдрат талбайд узель тавихаар шийдвэрлэж тохирсон юм. Гэтэл одоо эндэхийн оршин суугчид хонгилд байгаа бойлерийг гарга хэмээн буцаагаад шүүхдээд байгаа. Бид уг нь өнгөрсөн өвөл эндэхийн 50 гаруй өрхийг дулаанаар хангасан шүү дээ.

Ер нь хүмүүс мөнгөтэй хүнийг дарамталж амьдардаг болсон байна. Тэд мөнгөний төлөө л удаа дараа биднийг шүүхэд өгч байгаа. Тэдэнд өөр ямар ч зорилго байхгүй.

-Танай барилга барьсан уг газрыг Нийслэлийн өмчийн мэдлийн газар гээд байгаа. Энэ үнэн үү?

-Үгүй. 2001 онд одоогийн УИХ-ын дарга З.Энхболдыг Төрийн өмчийн хорооны дарга байхад дуудлага худалдаагаар авч байсан.

-Тухайн үед хэдэн төгрөгөөр худалдаж авсан юм бэ?

-Тэр үед гурван газар дуудлагаар орж байсан. Энэ газрыг бид 55 сая төгрөгөөр худалдаж авч байсан. Бүх зөвшөөрөл, газрын гэрчилгээ нь байгаа.

-Газрын зөвшөөрлөө хэзээ авсан бэ?

-Анх энэ газар чинь 3000 ам метр талбайтай байсан. Хэдийгээр газраа 2001 онд дуудлага худалдаагаар авсан ч, 2007 он хүртэл газрын зөвшөөрлөө аваагүй байсан. Гэтэл одоо 432 ам метр талбайд л 14 давхар барилгаа бариад байна. Биднийг газрын зөвшөөрлөө хөөцөлдөөд явж байх 2001-2007 оны  хооронд манай газар дээр Олон улс судлалын дээд сургууль барилгаа барьчихсан. Бид тухайн үед шүүхэд хандья гэхээр газрын гэрчилгээ маань гараагүй байсан. Магадгүй эндэхийн оршин суугчдыг Олон улс судлалын дээд сургуулийн удирдлагууд турхирч, тэдний явуулгаар ийм асуудал үүсээд байж магадгүй.

-Газрын зөвшөөрлийн цаана авлига байдаг гэдэг?

-Ганц зөвшөөрөл авахад хэцүү байдаг. Үүний цаана хүнд суртал, авлига, дарамт шахалт нуугдаж байдаг нь үнэн. Манай барилгын хувьд зөвшөөрөлтэй. Зөвхөн уг барилгын доор газан бойлер ашиглалтад орсон байна гэх үндэслэлээр Захиргааны хэргийн шүүхээс барилгын ажлыг түр зогсоосон. Тэгээд шүүх хурлыг нь хийлгэе гэхээр өөрсдөө хуралдаа оролцдоггүй. Үнэндээ энэ барилгын доор ямар ч газан бойлер байхгүй. Үүнийг шүүхийнхэн ч мэдэж байгаа. Манай компанийн барьж буй энэ барилгаас болж Төрийн албанаас 10 гаруй хүн ажлаасаа халагдсан.

-Яагаад?

-Тэд дээд шатны байгууллагадаа “энэ барилгын доор газан бойлер байхгүй” гэж үнэнг нь хэлэхээр “Чи Л.Чинбатаас авилгал авсан байна” гээд ажлаас нь халчихдаг. Сүүлдээ хотын захиргааныхан манайхтай холбоотой асуудал дээр зугатаадаг болчихсон. Хэнд ч хандсан “Танайх хэл амтай. Болъё” гэдэг. Эсвэл асуудалд маань дөрөөлж мөнгө авах гэж шантаажилдаг. Үүнээс болж манай компани бүхэл бүтэн 12 жил хохирч байна. Уг нь үе үеийн Засгийн газар бизнесийн дарамтыг арилгаж олон арван зөвшөөрлийг багасгана гэж ярьдаг ч үр дүн багатай байна.

-Хэрэв шүүхийн шийдвэрээр барилгаа нураа гэвэл нураалгахад бэлэн үү?

-Үгүй. Миний энэ орон сууцны барилга чанарын өндөр түвшинд баригдаж байгаа. Ганц зөвшөөрлийн асуудлаас болж, их хэмжээний хөрөнгө мөнгө, энэ олон хүний хүч хөдөлмөр, хүсэл мөрөөдлийг баллах гэж үү. Би арван жил ноцолдож байж арай гэж барилга барих гэж байна. Тийм их саад бэрхшээл давж, цаг хугацаа алдсан юм шүү. Таны нүдэн дээр өчнөөн жилийн чинь хөдөлмөрийг нураавал яах уу.

Б.Цэрэндэжид