Баянгол дүүргийн VII, XIII хорооны нутаг дэвсгэр хорооллын эцсийн уулзварыг “Гудамж” төслийн хүрээнд өргөтгөн шинэчилж, өчигдөр нээжээ. Тус уулзварын зарим зорчих хэсгийн эгнээ цөөнөөс гадна замын элэгдэл эвдрэл их байсан. Мөн хөдөлгөөний зохион байгуулалт буруугаас шалтгаалан түгжрэл үүсдэг байсан.

Тэгвэл уулзварын зорчих хэсгийн талбайг 2902 ам метрээр өргөтгөж, нийт 13046 ам метр талбайд асфальтбетон хучилт хийжээ. Өөрөөр хэлбэл, өмнө нь 2 эгнээтэй байсан зорчих хэсэг 3 болон 5 эгнээтэй, 3 эгнээтэй байсан нь 4 эгнээ бүхий зорчих хэсэгтэй болсон байна. Түүнчлэн, уулзварын өргөтгөлд орсон инженерийн шугам хоолойг цогцоор нь шинэчилсэн юм. Зорчих хэсгийг өргөтгөхдөө замын голын хэт өргөн тусгаарлах зурвасыг ашигласан нь газар чөлөөлөлт гэх мэт нэмэлт ажил шаардахгүйгээр зам барилгын ажлыг богино хугацаанд дуусгахад дөхөм болсон байна. “Гудамж” төслийн хүрээнд хамгийн эхлээд Өргөөгийн уулзварыг өргөтгөн шинэчилсэн. Өчигдөр III, IV хорооллын эцсийн уулзварыг шинэчлэгдлээ. Тэгвэл удахгүй гэмтлийн эмнэлгээс уруудсан замыг I хорооллын арын замтай шууд холбосон шинэ уулзвар удахгүй ашиглалтад орно. Харин дараагийн ээлжинд Ахуйн үйлчилгээний уулзварыг өргөтгөхөөр төлөвлөжээ. Ингэснээр хороолол чиглэлийн авто замын сүлжээг цогцоор нь шинэчилж, байгаа юм. Хорооллын эцсийн уулзвар нь “Гудамж” төслийн хүрээнд өргөтгөн шинэчлэхээр төлөвлөсөн 33 уулзвараас ашиглалтад орж буй 11 дэх уулзвар нь аж. Д.Цэцэг