Муу сайн хэлүүлсэн ч Монголын засгийн газар Чингис бондыг гадаадын хөрөнгө оруулагчидад амжилттай арилжсан. Чингис бондыг “Жи Пи Морган”, “Дойче банк”, “Банк оф Америка”, “Хонконг & Шанхай” зэрэг 20 том компани, банк худалдан авсан гэсэн мэдээ бий. Чингисээс угсраад “Самурай бонд”-ын сураг бас сонсогдоод эхэлсэн. Энэ нь Японы зах зээлээс иенээр хөрөнгө босгох боломж гэсэн үг.

.

Ерөнхий сайд Н.Алтанхуяг Япон улсад хийх айлчлалын үеэр энэ талаар хэлэлцэх гэнэ. Гэхдээ иенээр мөнгө босгох нь манайд хэр ашигтай, үр өгөөжөө бодитойгоор өгч чадах эсэх, “Самурай бонд”-ыг Монгол улс гаргах үгүй нь эцсийн байдлаар манайх шийдээгүй. Манай талаас хэдэн жилийн өмнөөс уг бондын талаар судалж байгаа гэнэ. Хэрэв иенээр мөнгө босгохоор бол манайх Чингис, Самурай гэсэн хоёр бондтой болох юм. Гэхдээ эргэн төлөлтийг хийхэд бас зарим хүндрэл үүсэх магадлалтай. Иймд японы зах зээлд бараа бүтээгдэхүүн экспортолж, иенийн урсгалыг нэмэгдүүлэх нь хамгийн зохимжтой хувилбар гэж албаныхан үзэж байгаа.

.

Азийн хэд хэдэн орон тус бондыг гаргасан тохиолдол бий. Филиппин улс Японы зах зээл дээр 2010 онд  105.4 тэрбум иенийн жилийн 2.32 хувийн хvvтэй бонд гаргасан. Мексик, Индонези зэрэг улс 2009 онд 100 гаруй тэрбум иенийн бонд гаргаж санхvvжилт босгосон байх юм.

.

Энэ бондыг давуу тал нь баталгаа. Японы Олон улсын хамтын  ажиллагааны банк, Экспорт хөрөнгө оруулалтын даатгалын байгууллагаас сүүлийн үед “Самурай бонд”-д баталгаа гаргаж өгөх болсон байна. Филиппин, Индонези улсаас гаргасан "Самурай бонд"-д л гэхэд 2009 онд 95 хувийн баталгаа гаргасан байх жишээтэй. Харин манай Засгийн газрын гаргах “Самурай бонд”-д Японы Хамтын ажиллагааны банк нь 85-95 хувийн баталгаа гаргаж өгөх бололцоотойгоо илэрхийлсэн гэх мэдээг албаны хүн хэллээ. Ийм баталгаа нь “Самурай бонд”-ын хүүг хямдруулах нөхцөлийг бүрдүүлж өгдөг гэнэ.

.

Ц.Золзаяа