“Бээжингийн гудамж” төслийг хэрэгжүүлэх хамтын ажиллагааны санамж бичигт  нийслэлийн Засаг даргын Зам тээвэр, дэд бүтцийн асуудал хариуцсан орлогч Н.Гантөмөр, БНХАУ-ын “Бээжин” корпорацийн инженер группийн Монгол дахь салбарын захирал Дү Лиан Ванг нар өчигдөр гарын үсэг зуржээ. Ингэснээр БНХАУ-ын Засгийн газрын 60 сая юанийн буцалтгүй тусламжаар хэрэгжих “Бээжингийн гудамж” төсөл албан ёсоор эхэлж байгаа юм. Бээжингийн нэрэмжит гудамж нь МУИС-ШУТИС-ийн уулзвараас БНХАУ-ын ЭСЯ-ны урдуур Сансарын туннель хүртэл үргэлжлэх юм. Төслийн хүрээнд Бээжингийн гудамжны 0.9 км автозамыг 6 урсгалтай болгож өргөтгөн шинэчлэх, Сэлбийн голын 45 у/м гүүрийн өргөтгөл шинэчлэлт, борооны ус зайлуулах шугам, автозамын гэрэлтүүлэг, гэрлэн дохионы шинэчлэлт, гудамжны тохижилтын ажил хийгдэх ба тус гудамжны 1960-70-аад оны инженерийн шугам сүлжээг шилжүүлэх, шинэчлэх ажлыг хийх юм байна. Д.Цэцэг