Татварын орчинд өөрчлөлт орох төлөвтэй. 16-нд хуралдах чуулганаар Татварын багц хуулийг хэлэлцэх юм. Татварын багц хуулийн хүрээнд 17 хуулийг өөрчилж, шинэчлэх, шинээр боловсруулах ажил явагдаж байгаа юм. Үүнд, Өв залгамжлалын албан татвар, Хотын татвар, Үл хөдлөх эд хөрөнгийн албан татвар, Эд мөнгөний хонжворт сугалааны хууль, Онцгой албан татвар, Газрын хэвлийн төлбөр, Гаалийн тарифийн тухай хууль, Гаалийн тухай хууль, Аж ахуйн нэгжийн орлогын албан татвар, Нэмэгдсэн өртгийн албан татвар, Хувь хүний орлогын албан татвар, Бэлэн ба бэлэн бус төлбөр тооцоог бүртгэх тухай, Хөрөнгийн албан татварын хууль, Байгалийн бохирдлын төлбөр, Ашигт малтмалын болон газрын тосны төлбөр, Байгалийн нөөц ашигласны төлбөрийн тухай гэсэн эдгээр хуулиудыг Сангийн яамнаас боловсруулаад байгаа.

.

Шинэчлэгдэх хуулиар бол Улаанбаатар хотод амьдарч, хөдөлмөрлөж л байгаа бол та үйл хөдлөл бүртээ татвар төлөхөд хүрээд байгаа гэлтээ.

Хотын албан татвар төлөгч нь тухайн улиралд борлуулсан бараа, гүйцэтгэсэн ажил, үзүүлсэн үйлчилгээнд ногдуулсан албан татварыг харьяалах татварын албанд  сар бүхэн төлж байх.

.

Үл хөдлөх эд хөрөнгийн албан татварын хүрээнд  орон сууцанд амьдарч байгаа өрхөд квадрат метр тутамд жилд 1,000-10,000 төгрөгийн татвар ногдуулахаар болжээ. Сүүлийн үед улсын комисс хүлээж аваагүй ч ашиглалтад орсон орон сууцны барилгууд цөөнгүй. Тиймээс уг хуульд хэдийгээр улсын комисс хүлээж аваагүй ч ашиглалтад орсон л бол тухайн орон сууцны эзэмшигч хуулийн дагуу жилийнхээ татварыг төлөх ёстой гэнэ.

.

Мөн агаар, ус бохирдуулсан, хог хаягдал хаясан этгээдээс Байгалийн бохирдлын тухай хуульд заасны дагуу төлбөр авахаар тусгаад байна. Өөрөөр хэлбэл, Улаанбаатарын агаарын бохирдлын буруутан гэр хорооллынхон жил бүр тодорхой хэмжээний татвар өгч магадгүй гэнэ. Тус хуулийн төсөлд агаарт гаргах хаягдлын бохирдуулах бодисын төлбөрийн хувь хэмжээг килограмм тутамд 1-10 төгрөгийн хязгаарт багтаан Засгийн газар тогтооно гэсэн заалт оруулжээ.

.

Ганцхан нүүрс төлж байгаа өрх биш нүүрс олборлосон аж ахуйн нэгж байгаль бохирдуулсныхаа төлбөрийг төлөх гэнэ. Олборлосон түүхий нүүрсний төлбөрийн хувь хэмжээг нүүрсний килограмм тутамд 1-2 төгрөгийн хязгаарт багтаан Засгийн газар тогтоох гэнэ.

.

Түүнчлэн энэ хуулийн дагуу автомашинаас авах татварын хэмжээнд өөрчлөлт орох бололтой. Мөн Хөрөнгийн албан татварын хуулийн дагуу авто тээврийн хэрэгсэл эзэмшигч бүхэн татвар бас төлөх ёстой.

.

Ц.Золзаяа